Алтынньы 23 күнүгэр Е.А. Борисов аатынан улуустааҕы киин библиотекаҕа “Эгэй-сэгэй” сахаэтнофитнес түмсүү 5 сыллаах үлэтин көрдөрөр саҥа кинигэ-альбомун сүрэхтэниитэ бэрт сэргэхтик буолан ааста.“Эгэй-сэгэй” сахаэтнофитнес түмсүү салайааччыта Парасковья Васильевна Гладкина – Алыптаана  тэрийэн үлэлэтэ сылдьар түмсүүтүн кытта оҥорбут  кинигэ-альбома 15 экземплярынан Дьокуускай куоракка бэчээттэнэн таҕыста.Бу кинигэ-альбом түмсүү үлэтин көрдөрөр үгүс  хаартыскалартан, видео материаллартан турар, ону тэҥэ манна дьарыктанааччылар ахтыылара киирбиттэр. Кинигэ-альбом ис хоһооно сахалыы музыка доҕуһуолунан  сахалыы таҥастаах  хамсаныы дьарыктара биир тэтимҥэ киирэн кэрэ эйгэҕэ, чэгиэн чэбдик сылдьыыга, үҥкүүттэн дуоһуйууну ылыыга киьи үс кута ситимнэһиитин кэпсиир.«Эгэй-Сэгэй” түмсүү салайааччыта Парасковья Васильевна кинигэтин билиһиннэрииттэн саҕалаан кэлбит ыалдьыттары сахалыы фитнес хамсаныылары оҥорторон сэргэхситтэ.Бу дьоро киэһэҕэ “Эгэй сэгэй» сахаэтнофитнес кэрэ эйгэтигэр дьарыктанааччылар, сэҥээрээччилэр кэлэн бэйэлэрин истиҥ тылларын, эҕэрдэлэрин тириэртилэр. Чурапчы улууһа муниципальнай оройуон социальнай боппуруостарга управлениетын иһинэн дьиэ кэргэн киинин салайааччыта Татьяна Петровна Бушкова, улуус общественнай түмсүүлэрин салаайыччата Екатерина Семеновна Иванова, Чурапчы улууһа муниципальнай оройуон баһылыгын социальнай боппуруостарга солбуйааччыта Мария Филипповна Кронникова  Парасковья Васильевнаҕа кэрэ аҥардары  доруобуйаны, ис туругу тупсарыыга сахалыы куттаах ураты көрүҥ ньыматынан уһуйар, угуйар үтүө дьыалатын иһин махтаннылар, наҕараада туттардылар.