Саха сиригэр Комсомол тэриллибитэ 100 сылынан, 

муус устар 15 күнүгэр киин библиотека ааҕар саалатыгар 

хомсомуол, баартыйа, үлэ, судаарыстыбаннай сулууспатын бэтэрээнэ, Хоптоҕо нэһилиэгин Бочуоттаах олохтооҕо Христина Петровна Федулова «Сүрэхпэр сөҥөрдөн» уонна «Эрчимнээх эдэр сааспыт Комсомол» диэн хомуйан оҥорбут кинигэлэрин сүрэхтэниитэ буолла. 

«Сүрэхпэр сөҥөрдөн» кинигэтигэр Чурапчы улууһун 70-с сыллардааҕы комсомольскай активтар, комсомолга уһаарыллан салайааччы буолбут дьон,  Хоптоҕо нэһилиэгин комсомолецтарын туһунан  ахтыылар киирбиттэр.

«Эрчимнээх эдэр сааспыт Комсомол» кинигэтигэр оройуоннааҕы комсомольскай тэрилтэ активистарын, Комсомол ветераннарын, Комсомол райкомун секретардарын ахтыылара, Комсомолга иитиллибит оройуон салайааччыларын туһунан матырыйааллар киирбиттэр. 

Истиҥ эҕэрдэтин «Чурапчы улууһа (оройуона)» МТ баһылыгы социальнай политикаҕа уонна бэйэни салайыныыга солбуйааччы Н.И.Аммосов тиэртэ. 

Комсомол кэминээҕи эрчимнээх эдэр саастарын ахтан-санаан аастылар Анастасия, Михаил Филипповтар,  С.И. Никитин, райкомол бастакы сэкирэтээрэ Н.Н.Хоютанов, үлэ үөһүгэр сылдьыбыт комсомолецтар Е.Е.Окорокова, А.П.Кузьмина, А.М.Слепцов уо.д.а.

Оройуон Комсомолун 100 сыллаах историятын кэпсиир кинигэлэр түмсүүлээх, тэрээһиннээх, дойду олоҕун бары эйгэтигэр активнайдык кыттыыга үөрэнниннэр,  туһанныннар диэн кэнчээри ыччакка ананар.