От ыйын 1 күнэ — Саха сиригэр национальнай бэчээт күнэ. Олунньу 13 күнүгэр 2020 сыллаахха Саха  Өрөспүүбүлүкэтин  Ил Дархана Айсен Николаев ыйааҕынынан олохтоммут  бэлиэ күн.  Бу  күн аан бастакы сахалыы политическай, общественнай уонна литературнай “Саха дойдута” (“Якутский край”) хаһыат бэчээттэммитэ. Чурапчы улууһун   “Саҥа олох хаһыата  улуус  сайдыытын,  олоҕун-дьаһаҕын, үлэтин-хамнаһын кэрэһэлиир, бэлиэ түгэннэри үйэтитэн, историяҕа хаалларар, сонуну-нуомаһы   дьоҥҥо-сэргэҕэ  сырдатар, нэһилиэнньэ  үгүс дьонун  арахсыспат аргыһа, кэтэһиилээх доҕоро буолар.    “Саҥа олох”  сахалыы тыллаах хаһыаттартан  (Бүлүү улууһун кэнниттэн) биир бастакынан тэриллибитэ. Бастакы хаһыат 1931 сыллаахха алтынньы 15 күнүгэр   “Социализм суола” диэн ааттанан, биир дойдулаахпыт С.А.Новгородов  латыынныы алпаабытынан  2000 экземплярынан  тахсыбыта. Оройуоннааҕы типография  салайааччытынан Алексей  Евграфьевич Кузнецов диэн нуучча киһитэ  үлэлээбитэ, онтон хаһыат  редакторынан Өлүөхүмэттэн төрүттээх  Петр Николаевич Гоголев  диэн “Кыым”  хаһыакка партийнай-комсомольскай отдел сэбиэдиссэйинэн үлэлээбит киһи куораттан анаммыта. Редакция эппиэттиир секретарынан суруйааччы Семен Степанович Яковлев – Эрилик Эристиин, литературнай үлэһитинэн поэт Алексей Алексеевич Васильев – Бэрияк үлэлээбитэ.  Мэлдьэхситтэн төрүттээх Александра Посельская типографияҕа наборщик үөрэнээччитинэн ылыллан, кэлин оройуоҥҥа бастакы полиграфиһынан буолбута. Типография уонна редакция оччолорго холбоон 8 үлэһиттээхтэрэ.     1962 сыллаахха бэс ыйын 1 күнүгэр  “Социализм суола” хаһыат, билиҥҥи “Саҥа олох” аатынан тахсыбыта. Билигин  “Сахабэчээт” Судаарыстыбаннай  автономнай тэрилтэтин   «Саҥа олох” хаһыат   эрэдээксийэтэ  буолан олоҕу кытта  тэҥҥэ хардыылаан  улуус олоҕун-дьаһаҕын  сырдатан таһаарыылаахтык, айымньылаахтык   үлэлии-хамныы олорор.        Улуустааҕы киин библиотека  “Саҥа олох” электроннай архыыбыгар  хаһыат нүөмэрдэрэ 1969 сыллаахтан ыла киирэн  оройуон, улуус  историятыгар  араас кэмнэргэ буолан ааспыт бэлиэ түгэннэри, чахчылары кэрэһэлииллэр. Күндү ааҕааччыларбыт!  Хаһыат  урукку уонна сонун нүөмэрдэрин көрүҥ, ааҕыҥ, туһаныҥ! Сигэ: https://churlib.saha.muzkult.ru/Archiv