Быйылгы саҥа сылга тохсунньу ый 10 күнүгэр Е.А.Борисов аатынан киин бибилэтиэкэҕэ Чурапчы чулуу киһитэ, биир дойдулаахпыт, айылҕаттан айдарыылаах, Аан дойдуга аатырбыт график, РСФСР  уонна Саха сирин норуодунай худуоһунньуга Афанасий Петрович Мунхалов төрөөбүтэ  90 сылыгар анаммыт “Мунхалов планетата” арт-галерея фондатыттан “Саха Сарсыҥҥылаах Санаалара” диэн сүдү күүстээх эйгэлээх, худуоһунньук бэйэтэ айан хаалларбыт  хартыыналарын көһө сылдьар быыстапкатын аһыллыыта буолан ааста. Улуу худуоһунньукпут талааныгар сүгүрүйэр, айар үлэтин сэргиир дьон-сэргэ кэлэн быыстапканы сэҥээрэн, астынан тарҕастылар. Кэлбит дьон Афанасий Петрович уруһуйдаан хаалларбыт  Алгыстаах баайы-дуолу, тапталы, оҕо кутун тардар хартыыналарын стикердэрин бэлэх туттулар. Быыстапканы киин бибилэтиэкэ «Үүн-сайын» медиалабораториятыгар үлэ чааһын кэмигэр кэлэн көрүҥ диэн ыҥырабыт.