Кулун тутар 28 күнүгэр Саха Өрөспүүбүлүкэтин Национальнай бибилэтиэкэтэ  төрүттэммитэ 100 сылын көрсө Чурапчы улууһугар Национальнай бибилэтиэкэ күннэрэ буолан ааста. Өрөспүүбүлүкэ араас оройуоннарыттан бибилэтиэкэлэр салайааччылара, улууспут бибилэтиэкэрдэрэ, литературнай түмсүүлэр, бибилэтиэкэ бэтэрээннэрэ, нэһилиэк общественноһа дьоро тэрээһиҥҥэ кытыннылар. Улууспут баһылыга С.А.Саргыдаев кэлбит ыалдьыттары эҕэрдэлээн туран улууспут историятын сырдатта, Национальнай бибилэтиэкэттэн директоры бастакы солбуйааччы В.Б. Борисов  национальнай бибилэтиэкэ 100 сылыгар ананар тэрээһиннэри, бырайыактары билиһиннэрдэ, Чурапчы улууһун кииннэммит бибилэтиэкэтин ситимин дириэктэрэ А.М.Смирникова, улуус бибилэтиэкэлэрэ ыытар үлэлэрин, инники соруктарын туһунан иһитиннэрии оҥордо. Салгыы Өрөспүүбүлүкэбит  бастакы бэрэсидьиэнин М.Е.Николаев аатынан архыып –бибилэтиэкэ саҥа бырайыактарын уонна үлэтин-хамнаһын сүрүннүүр исписэлиис А.С.Захарова  кэпсээтэ. Чурапчы улууһун баһылыгын социальнай боппуруостарга солбуйааччы М.Ф.Кронникова улуус култууратын үлэтин киэҥник ырытан мустубут дьоҥҥо билиһиннэрдэ.  Түмүккэ Чурапчы улууһун дьаһалтата уонна Национальнай бибилэтиэкэ бииргэ үлэлиир туһунан сөбүлэҥҥэ үөрүүлээх быһыыга-майгыга илии  баттастылар.      

      Күн иккис аҥарыгар киин бибилэтиэкэ саалатыгар «Современные подходы и технологии в библиотечном деле: от традиций к современности» диэн  Өрөспүүбүлүкэ бибилэтиэкэлэрин дириэктэрдэрин семинарын түмүктүүр чааһа буолла. Бу тэрээһиҥҥэ Горнай, Сунтаар, Хаҥалас бибилэтиэкэлэрин ситимин дириэктэрдэрэ,  ону тэҥэ киин бибилэтиэкэ уонна нэһилиэк филиалларын бибилэтиэкэрдэрэ Россияҕа уонна Өрөспүүбүлүкэҕэ ыытыллар куонкурустарга Грант ылбыт  бырайыактарын билиһиннэрдилэр, ыытыллар үлэлэрин уопутуттан үллэһиннилэр.

Национальнай бибилэтиэкэ аныгы технологияларынан бибилэтиэкэнэн хааччыйыы үлэтин сайыннарар исписэлиистэрэ улууспут үөрэҕин тэрилтэлэригэр уонна Чурапчытааҕы спорт үнүстүтүүтүтүн устудьуоннарыгар, преподавателлэригэр, туһааннаах исписэлиистэригэр анаан национальнай бибилэтиэкэ сайтын билиһиннэрдилэр уонна хайдах туһанарга үөрэттилэр.

Биир олус наадалаах уонна туһалаах тэрээһининэн улуус уонна оскуола бибилэтиэкэрдэригэр национальнай бибилэтиэкэ реставрационнай киинин исписэлиистэрэ хаһыаты чөлүгэр түһэриигэ маастар кылаас ыыппыттара буолла. Ыалдьыттарбыт Д.П.Коркин аатынан спорт уонна А.А.Саввин аатынан этнография уонна история түмэллэригэр экскурсиялаатылар.