Е.А.Борисов аатынан киин бибилэтиэкэҕэ муус устар 4 күнүгэр биллиилээх общественнай-политическэй диэйэтэл, өр кэм устата спорт оскуолатын дириэктэринэн, Саха Өрөспүүбүлүкэтин физкультураҕа уонна спорка миниистиринэн үлэлээбит, Арассыыйа тыатын сиригэр физкультура уонна спорт үрдүк үөрэх кыһатын аан бастакынан аспыт, тэрийбит, салайбыт, Саха Өрөспүүбүлүкэтин Бырабыытылыстыбатын Бэрэссэдээтэлин солбуйааччынан, Ил Түмэнин I уонна VI ыҥырыыларын депутатынан талыллан үлэлээбит педагогика билимин дуоктара, Арассыыйа физкультураҕа уонна спорка үтүөлээх үлэһитэ,  Доҕордоһуу уордьан кавалера Михаил Дмитриевич Гуляев туһунан С.А.Новгородов аатынан «Айар» НКК «Саха киэн туттар дьоно» 2005 сыллаахха олохтоммут сиэрийэнэн Василий Федорович Посельскай хомуйан таһаарбыт кинигэтин сүрэхтэниитэ буолла. Кинигэ биһирэмин ырытан, салайан ыытта В.А.Платонова, Е.А.Борисов архыып-бибилэтиэкэтин отделын сэбиэдиссэйэ.  

  Кинигэ барыта 10 улахан бастан турар, ол курдук: бастакы баһа  «Олох киэҥ аартыгар» диэнтэн саҕаланар, салҕыы «Үөрэх систиэмэтин кыһатыгар», «Күүстээх үлэ саҕаланыыта», «Развитие физической культуры и спорта в РС(Я)», «Развитие массового и детско-юношеского спорта», «Государственная политика в сфере физической культуры и спорта», «Физкультура уонна спорт инники күөнүгэр», «Спорт уонна личность», «Ыстатыйалар, интервьюлар», «Норуот үрдүк итэҕэлэ» диэн Михаил Дмитриевич улахан, киэҥ далааһыннаах үлэтин, олоҕун сиһилии сырдаталлар. Бииргэ үлэлээбит үөлээннээхтэрин, доҕотторун ахтыылара, суруналыыстар ыстатыйалара, «Саха» НКИК матарыйааллара, Саха Өрөспүүбүлүкэтин министиэристибэлэриттэн, Ил Дарханын уонна Бырабыытылыстыбатын администрациятыттан докумуоннар кинигэҕэ түһаныллыбыттар, элбэх хаартыскаларынан байытыллыбыт.

Бу тэрээһиҥҥэ кинигэ автора Василий Посельскай, Ил Түмэн бэрэссэдээтэлэ Алексей Еремеев салалталаах депутаттар, Чурапчы улууһун баһылыга Степан Саргыдаев, СӨ физкультураҕа уонна спортка миниистирин бастакы солбуйааччы Гаврил Мохначевскай уонна бу министиэристибэ үлэһиттэрэ, Госкомспортан уонна манна киирэр тэрилтэлэртэн, Россия Мас-рестлинин федерациятыттан, Д.П.Коркин аатынан Республиканскай оскуола интэринээттэн, Чурапчытааҕы судаарыстыбыннай физкультура уонна спорт үнүстүүтүттэн бииргэ үлэлээбит кэллиэгэлэрэ, табаарыстара, спорт хаһыатын, сурунаалларын кэрэспэдьиэннэрэ, суруналыыстара, доҕотторо, үөлээннээхтэрэ уонна дьиэ кэргэнэ кыттыыны ыллылар, бэйэлэрин санааларын үллэһиннилэр, эҕэрдэлэрин тиэртилэр.