Чурапчы улууһун олохтоох ааптардарын оҕоҕо, ийэҕэ-аҕаҕа, төрөөбүт дойдуга  анаммыт нарын-намчы иэйиилээх, истиҥ-иһирэх хоһооннорун  кинигэлэрин  электроннай  библиотекаҕа  уонна  абонемент  салаатыгар  ааҕыҥ, сэргээҥ, уларсыҥ!  https://churlib.saha.muzkult.ru/avtoru

Оҕом оҕото

Оҕом, оҕом биэбэйим,

Кыра-кыра  көмүһүм,

Сып-сырдык сулуһум,

Чып-чырып чыычааҕым,

Мин күнүм, мин ыйым,

Мин ырыам, мин үөрүүм,

Мичийэр мичээрим,

Манньынар мааныкам,

Мин оҕом, мин сиэним,

Мин кэрэ кэскилим,

Мин туллар тутааҕым

Мин баарым, мин суоҕум

Мин баайым, мин дуолум

Мин оҕом оҕото  — сүрэҕим чопчута.

 2012

                   Евдокия Дьячковская-Иэйэ 

 

Ийэм чараас былаата

Ийэм чараас былаатын

Сүрэхпэр сыһыары тутабын,

Үгүһү-күндүнү санааммын

Долгуйан, чуумпуран олордум.

 

Бу былаат кырачаан бэйэтэ

Истиҥ да иэйиини саҕар дии,

Ыраатан, айаҥҥа барарбар

Аргыһым, доҕорум буолар дии.

 

Мин ийэм сэмэй бу былаата

Аанньаллыы  арчылыыр алгыстаах,

Олохпор  оҕолуу бүөбэйдиир

Мин ийэм бу аптаах былаата.

 

Ийэм ыраас санаатын

Иҥэриммит нарын былаат,

Ийэм күүстээх, итии тапталын

Уҕараабат, күндү ситимэ.

             Евдокия Дьячковская-Иэйэ

 

Сиэннэр күҥҥэ тэҥнээхтэр

Сиэним суоҕар сытабын

Сиһим, төбөм да ыалдьар,

Сиэммин көрөөт турабын

Сирэй харах, дьэ, сырдыыр.

 

Чэмэлийэн киириэҕэ

Чуопчаарыйа туойуоҕа,

Тугу бары сэргиэҕэ

Туотарыйа хаамыаҕа.

 

Сылайбакка сүүрүөҕэ

Салгыбакка ыйытыа.

Туохха бары ыттыаҕа

Туһалаабыт аатырыа.

 

Сиэммит – олох тутааҕа.

Сиэдэрэйкээн симэҕэ,

Сүрэх үөрэр чыычааҕа.

Сиргэ күммүт тэҥнээҕэ.

             Анна Барашкова- Айылҕаана

 

Махталынан хардарыах

Күнү көрө төрүөхтэн

Ийэ-аҕа баарыгар

Харысхалбыт халыҥыыр.

Оҕо кэҥиир эйгэтин

Ийэ өрүү арчылыыр.

 

Оҕом саары чаккылаах –

Син биир киһи буолуохтаах

Ыыра кэҥиир кэскиллээх –

Сиргэ тирэх  буолуохтаах,

Ийэ өрүү эрэллээх.

 

Сиргэ олох туттарбар

Саҥа суолу тэлэрбэр

Иллэҥ кэми булбакка

Ийэм,аҕам дьиэтигэр

Кэлбэтэхпин элбэхтэ.

 

Куту кууһар иэйиини,

Толорутук тиэрдэри,

Сүрэх сүүйэр тыллары

Эппэтэҕим ситэри,

Сэрэйдэҕэ буолуо дуу.

 

Көҥүл оҕо сааспытын

Бэлэхтээбит аҕаҕа,

Оҕом кэлиэ дии санаан

Өрүү күүтэр ийэҕэ

Бүгүн этиэх таптыыры.

             Анна Барашкова — Айылҕаана

Оҕолор

Мичилийбит харахтар

Күн тэҥэ сырдыктар,

Тырымнаспыт харахтар,

Күн сарыала уоттаахтар.

 

Чуопчаараллар чыычаахтар

Чугдаараллар чуорааннар,

Тула көтөр чыычаахтар

Туорахтанар ымыылар.

 

Кэрэкэтин эбитин

Көрө үөрэр туллуктарбыт,

Эмдэй–сэмдэй бэйэлэрэ

Эйэҥэлэһэр уолчааннар.

                    Иннокентий Алексеев

Оҕо

Оҕо санаа ымыыта,

Оҕо оонньоон ылара,

Оҕо дьикти күлүүтэ —

Олох сырдык сарыала.

 

Таптал уота суһумнуур

Түлам өттүн сырдатан,

Кууһан ылыым оҕобун

Кыра кэрэ бэйэтин.

 

Сүрэх үөрэр сыллыыртан

Сылаанньыйан ылбахтыыр,

Дьикти чаҕыл көрүүттэн

Дууһаҥ ыллаан сипсийэр.

 

Олох устун эрдээхтик

Оломнору туорааҥҥын,

Кэскилбитин тэнитэн

Кэрэ киһи дэттэриэн.

 

Дьоллоох кэмиҥ кэлиэҕэ,

Дьоһун мааны ыал дэтиэҥ.

Оҕолонуон, уруйданыан

Оҕо сааскын санаан ылыаҥ.

            Иннокентий Алексеев