Сэтинньи 28 күнүгэр Е.А.Борисов аатынан киин бибилэтиэкэҕэ РСФСР уонна Саха АССР народнай артыыһа П.М.Решетников аатынан Чурапчытааҕы народнай театр 55 үбүлүөйдээх сылынан «Умнуллубат уобарастар” диэн ахтыы-сэһэргэһии кэрэ киэһэтэ буолан ааста. Бу көрсүһүүгэ режиссердар ССРС культуратын туйгуна Саха АССР үтүөлээх үлэһитэ Н.М.Заболоцкая, Саха Өрөспүүбүлүкэтин культуратын үтүөлээх үлэһитэ И.И.Бушков театр ис эйгэтин сэһэргээн сэгэттилэр. Театр бастакы көлүөнэ артыыстарын тустарынан чугас дьонноро көрдөрөр матырыйаал оҥорон, альбом, буклет аҕалан дьон болҕомтотун тартылар. «Төлөн Ньукуус» драматтан саҕалаан төлөнү сахпыт артыыстарбыт айылҕаттан бэриллибит талааннарынан дьон өйүгэр умнуллубат уобарастары айбыттарын аймахтара, чугас дьоно билиһиннэрдилэр.Ол курдук Корякин Никита Никитич туһунан Е.А. Новгородова, театр бэриниилээх артыыһа Мария Егоровна Седалищеваны төрөппүт кыыһа Петрова И.Н., Дорофеев Прокопий Кузьмич кэргэнэ М.П.Дорофеева уонна балта Е.С.Иванова, Петр Сидорович Попов уола А.П.Попов сиэнэ Попов П.А. аймаҕа А.И.Барашкова, Монастырев Егор Егорович кийиитэ Иванова А.В., Дегтярев Иван Константинович аймаҕа Т. В. Илларионова, Попова Елизавета Егоровна коллегата Л.М.Григорьева уонна Кузьмин Василий Васильевич кэргэнэ К.Е.Кузьмина кинилэр дьиэ кэргэттэрин,олорбут олохторун, толорбут  оруолларын, артыыс үлэтин туһунан саас сааһынан ырытан кэпсээтилэр. Бу ахтыылары режиссердара Н.М.Заболоцкая алтыспыт түгэннэриттэн, буолбут көрүдьүөстэринэн эбии ситэрэн кэпсээн биэчэри олус сэргэхситтэ. 85 хаарыгар сылдьар ытык кырдьаҕаспыт  Спартак  Григорьевич Слепцов  инники ахтыллыбыт артыыстары барыларын кытта алтыспыт киһи быһыытынан бэйэтин санаатын үллэһиннэ. Ытыктыыр киһибит, култуура бэтэрээнэ Василий Николаевич Дьячковскай кэргэнинээн Светлана Георгиевналыын кэлэн кыттыыны ылан бэйэтин ахтыытын оҥордо. Ону таһынан театр орто көлүөнэ артыыстара Н.Н.Хоютанов, А.М.Слепцов, Г.Г.Монастырев, К.П. Кондратьева оонньообут оруолларыттан, театрга алтыспыт кэмнэриттэн көрүдьүөстээх  түгэннэри ахтан мустубут дьону күллэрдилэр, үөртүлэр.Чурапчытааҕы кииннэммит библиотечнай ситим дириэктэрэ А.М.Смирникова көрсүһүү түмүгэр кыттыыны ылбыт ыалдьыттарга махтанна, сибэкки дьөрбөтө туттарда. Куораттан кэлбит ыалдьыппыт Петр Сидорович Попов уола Александр Петрович аҕатыгар анаан таһааттарбыт 3 туомнаах кинигэтин театр, бибилэтиэкэ коллективтарыгар биирдиилээн дьоҥҥо бэлэх уунна.  Биэчэр В.В. Кузьмин толорбут Чурапчы гиимин көрсүһүү кыттыылаахтара бииргэ ыллаһан түмүктээтилэр.  Бу курдук түмсэн, атах тэпсэн олорон кэпсэтии истиҥ-иһирэх быһыыга-майгыга ыытылынна. Театрбыт олоҕун, үлэтин, бастакы көлүөнэ артыыстарын туһунан элбэҕи, саҥаны билии арылынна. Кэлбит ыалдьыттар  астынан, махтанан, санаалара көтөҕүллэн, үөрэн тарҕастылар.