Ахсынньы 3 күнүгэр, Чурапчытааҕы киин библиотека ааҕар саалатыгар «Олоҥхото ааҕыахха» сэргэх тэрээһин буолан ааста. Бу күн уоскулаҥ алгыс ыламмыт, эмтээх оттоох чэй иһэн санаалыын ырааһырдыбыт. Бары мустубут дьон Чурапчыбыт олоҥхоһута Михаил Иннокентьевич Белых «Ала Хотоҕой» олоҥхотуттан ааҕан, тойукка холонон көрдүбүт. Кэлэн кыттыбыт дьон санаалара: Олоҥхо тула түмсэн, олоҥхону сэҥээрэн, олоҥхолуун алтыһан, олоҥхону истэн, улуус олоҥхоһуттарын олоҥхолорун билсэн олус сэргэхсийдибит, сэҥээрдибит саҥа санаалар үөскээтилэр. Биир хонтуораҕа үлэлээбит Василий Федорович Ермолаев Чурапчы олоҥхоһуттарын норуотугар суруйан хаалларбыт кинигэтин көрөн олус үөрдүм. Бу кинигэни Советскай былаас саҕана суруйбута, киһи сөҕөр үйэни өтө көрөн, бэйэтэ агроном идэлээх этэ. Билиҥҥи үйэ эбитэ буоллар олоҥхо суруйуохтаах эбит дии санаатым. Бүгүн библиотека уораҕайыгар өйү-санааны чөмчөлөөн, хас биирдии тема дириҥник, ымпыгар тиийэ дьон өйүгэр киирэн хааллын диэн, олоҥхо күүстээх жанр мээлэҕэ шедевр дэммэт. Киһи хара бастакыттан ылыммат, истиэн баҕарбат. Ону баара доҕоттоор, хас биирдии кэлбит кыттааччы ис истэриттэн ылынан, олоҥхоттон быһа тардан аахтыбыт, олоҥхо буолан баран тойугун холоннубут. Улууспут биир бастыҥ олоҥхону толорооччута Дьячковский Николай Романович олоҥхотун хас биирдии киһи иһийэн олорон иһиттибит.     Олоҥхобут симэлийбэккэ, сайда, чэчирии, үүнэ турдун.