Өй-санаа
- Аньыылаах санаа баттыылыга кэмсиниинэн эмиэ имийэр.
- Аһаҕас баастааҕар көстүбэккэ хаатыйаланар санаа бааһа ордук нүөлүтэр ыарыылаах.
- «Арай» диир алыптаах тыл көтүтэр дохсун кынаттаах.
- Баҕа уонна кыах сиэттиһэллэрэ эрэллээх.
- Баҕа санаа сиэтэр илиилээх.
- “Баҕар” дэтэр ыра санаа сирдиир модун күүстээх.
- Биирдэ атаҕастаммыт албыннаан ааттаһар.
- Бэйэтигэр эрэллээх киһи баламат майгылаах.
- Киһини өй-санаа олуура, сүрэх үөтүүтэ, кут-сүр эриирэ сатаан алтыһан сирдииллэр.
- Куолулаан үтүөмсүйээччи соруйан муннарар.
- Күлүктээх санааҕа үтүө ыра сыстыбат.
- Күүстээх санаа бухатыырдааҕар модьу доҕор.
- Кытаанах санаалаах киһи сүгэ-батас быһаарыылаах.
- Кэнэн киһи кэтэх санааламмат.
- Өйдөөхтөр, айылгыларынан, чэпчэки олоххо анамматтар.
- Өйдүүр-саныыр киһиттэн ыллыктаах тылла эрэй.
- Өй-санаа анаммыт киһитэ түбүктээх олохтоох.
- Өһүргэс өйдөөн кэлэ-кэлэ кыйыттар.
- Сайдам сүбэ саргылаах, сэлээр сэмэ сэттээх.
- Санаа сыстыбат киһитэ сааһыгар татым олохтоох.
- Саныыр санаа илиигэ туттарбат, өйдүүр өй таһыттан көстүбэт. Тыл этилиннэҕинэ, эриэнэ иһиллэр, илии хамнаннаҕына, баҕата таайыллар.
- Сэрэхтээх баҕа санаа соругу ситиһиннэрэр.
- Тоҕооһугар өй-санаа тобуллубат.
- Уйулҕаны мас баттаан моруулаабат, санаа баттаан эрэйдиир.
- Хара күүс – инчэҕэй эт.
- Хара күүстээҕэр санаа дьаныара соругу ситиһиннэрэр.
- Хары күүһэ муҥурданар кирбиилээх. Олох моһоллорун санаа күүһүнэн булгурутан аһараллар.
- Чахчыны уу харахпытынан утары көрөн да олордубут, туора омук дьонуну тылын итэҕэйэ үөрүйэхпит.
- Ыар санааны аралдьыйыы аһарар.
- Ыар –нүһэр санааны аралдьыттаран аһартараары, үрдүк Айыылар айгыр-симэх айылҕаны дьоҥҥо анаан айбыттар.
- Эҕэлээх өйдөөҕөр сайаҕас санаа алгыстаах.
- Эҕэлээх санаатааҕар истиҥ сыһыан өйөбүллээх.