Олунньу 25 күнүгэр А.А.Саввин аатынан Чурапчытааҕы история уонна этнография түмэл дьиэтигэр «Дьиэ кэргэн ытык мала» серия бырайыак чэрчитинэн «Өбүгэм өтөхтөөх малыгар махтана…» диэн Саха Өрөспүүбүлүкэтин култууратын туйгуна, коллекционер Варвара Ивановна Душкина тус коллекциятыттан уонна дьиэ кэргэнин ытык малларыттан ураты быыстапката арылынна.

Варвара Ивановна өбүгэлэриттэн XIX-XX үйэҕэ Арыылаах нэһилиэгэр олорон ааспыт Анна Ивановна, Дмитрий Михайлович Барашковтар кинилэр оҕолоро Евдокия, Иван тутта сылдьыбыт малларын көлүөнэнэн бэриллэн көрүллэн-хараллан кэлбит сахалыы мал-сал, иһит хомуос, туттар тэриллэр, былыргы таҥас-сап арааһыттан быыстапкаҕа туруорда, ону тэҥэ коллекционердар кэккэлэригэр аҕыйах сыллааҕыттан киирэн  саха сирин култууратын туһунан мунньар значоктарын көрдөрдө.  Хантан хайдах барыта саҕаламмытын олус истиҥник кэпсээн кэлбит ыалдьыттарга билиһиннэрдэ.

Быыстапка арыллыытыгар Чурапчы нэһилиэгин баьылыга В.Д.Сивцев, Улуус култууратын управлениятын начальнига П.Е. Гуляев, А.А. Саввин аатынан Чурапчытааҕы түмэл салайааччыта А.А.Захаров, Чурапчытааҕа «Маарыкчаан» коллекционердар түмсүүлэрэ, бииргэ үлэлиир коллегалара, бииргэ үөрэммит кылааһынньыктара, доҕотторо, аймах-билэ дьоно уонна кини быыстапкатын сэҥээрэр ыалдьыттар бэйэлэрин эҕэрдэлэрин, истиҥ тылларын тириэртилэр.

Быыстапка кулун тутар 11 күнүгэр диэри Чурапчытааҕа А.А.Саввин аатынан история уонна этнография түмэл дьиэтигэр туруоҕа. Кэлиҥ, көрүҥ, сэҥээрин.