Олох хардыытын кытта тэҥҥэ

Оҕо библиотеката доруобуйаларынан хааччахтаах оҕолору кытта ситимин быспакка үлэлиир. Билиҥҥи кэмҥэ илиинэн оҥоруу, сатабыл сыаналанар. Маны сөпкө туһанан, атыылаан харчы киллэрии дьиэҕэ үөрэнэр оҕоҕо тоҕоостоох диэн санааттан “Бэйэ дьарыгынан үбү киллэрии” диэн темалаах тэрээһини библиотека үлэһиттэрэ ыыттылар. Төрөппүттэргэ уонна оҕолорго үбү киллэрэргэ ордук табыгастаах дьарыктар тустарынан иһитиннэрии, нумизматик С.С.Иванов коллекциятын билиһиннэриитэ, “Алмазкредитсервис” специалиһа М.Д.Монастырева сүбэтэ интэриэһи тарта. Үбү киллэриигэ бастакы хардыылары оҥорууга маастар кылааһы О.Г. саҥа дьылы көрсө харыйа оонньуурун, И.М.Павлов аатынан Чурапчы орто оскуолатын 5 кылааһын үөрэнээччитэ Дьячковская Тина оҕоҕо ордук чугас слаймы оҥорууга үөрэттилэр. Бу күнү туһалаахтык атааран, үөрэн-көтөн тарҕастылар.

Олоҥхо күннэрэ Оҕо библиотекатыгар

Сэтинньи 25 күнүттэн нэдиэлэ устата Оҕо библиотекатын ааҕааччыларыгар аналлаах “Олоҥхо- норуот муудараһа” диэн Олоҥхо күнүгэр аналлаах уруоктар ыытылыннылар. Биир дойдулаахпыт Иннокентий Тимофеев-Теплоухов “Куруубай Хааннаах Кулун Куллустуур” оҕолорго аналлаах олоҥхону ааҕан, айымньы тула интерактивнай оонньуулары оонньоон, боппуруостарга эппиэттээн, тургутук толорон, олоҥхону кытта билсиһэн бардылар. “Олоҥхо абылаҥа” электроннай кинигэлэри бэлэх туттулар. “Олоҥхо алыптаах эйгэтэ” кинигэ быыстапката үгүс ааҕааччы болҕомтотун тарта. Социальнай партнербут Реабилитационнай центр иитиллээччилэрэ оҥорбут олоҥхо геройдарынан куукулалар киэргэттилэр.

Сэтинньи 26 күнүгэр Киин библиотека ааҕар саалатыгар “Олоҥхо диктана” тэрээһиҥҥэ кытынныбыт.

Дьиэ кэргэнинэн ааҕыы фестивала

Норуот олорбут олоҕо, тыына-дьылҕата тылыгар иҥэн сылдьар. Оҕо төрүөҕүттэн ийэ тылын эйгэтигэр иитилиннэҕинэ сахалыы кинигэлэри ааҕар буоллаҕына бэйэтин омугун харыстыыр киһи буолар. Төрөөбүт сахабыт тылын, суругун-бичигин тарҕатар Республикабыт биир кинигэтин кыһатынан С.А.Новгородов аатынан “Бичик” национальнай кинигэ кыһата буолар. Онон сахалыы ааҕыыны өйүүр сыаллаах фестиваль ыытылынна.

Күрэх 3 түһүмэҕинэн ааста:

1 түһүмэх. Саха Республикатын “Бичик” национальнай кинигэ кыһатыгар бэчээттэнэн тахсыбыт кинигэлэртэн талан, дьиэ кэргэнинэн уус-уран ааҕыы эбэтэр инсценировка көрдөрүү.

2 түһүмэх. “Бичик” национальнай кинигэ кыһатыгар бэчээттэнэн тахсыбыт кинигэлэринэн буктрейлер.

3 түһүмэх. “Сахалыы ааҕыыны өйүүбүт” диэн темаҕа плакат оҥоруута.

Үс түһүмэх түмүгүнэн “Бастыҥ туруоруу” номинация Ксенофонтовтар Хадаар нэһ.), “Бастыҥ уус-уран ааҕыы” Крыловтар (Болтоҥо нэһ.), “Бастыҥ буктрейлер” Григорьевтар Одьулуун нэһ), “Бастыҥ таҥыы” Кузьминнар (Чакыр нэһ.), “Бастыҥ плакат” Филипповтар (Чурапчы нэһ.). Кыайыылаахтар грамотанан, анал бириистэринэн наҕараадаланнылар. А.П.Гоголев аатынан оҕо искусствотын оскуолатын фортепьяно кылааһын үөрэнээччилэрэ Айаал Варламов, Саида Левина (препод. Макарова С.П.) музыканан киэргэттилэр.