Оҕо бибилэтиэкэтэ тэриллибитэ 70 сыллаах үбүлүөйүн бэлиэтээтэ
Ахсынньы 24 күнүгэр Чурапчытааҕы кииннэммит библиотечнай ситим анал отдела — Оҕо бибилэтиэкэтэ тэриллибитэ 70 сыллаах үбүлүөйүн бэлиэтээтэ. Үбүлүөй ахсынньы аам-даам тымныытын аахсыбакка итии-истиҥ быһыыга-майгыга үөрүүлээхтик, өрө көтөҕүллүүлээхтик Е.А.Борисов аатынан киин бибилэтиэкэ сылаас, сырдык саалатыгар ыытылынна. Оҕо бибилэтиэкэтэ бэйэтин 70 сыллаах үбүлүөйүн айымньылаах, таһаарыылаах үлэ-үөһүгэр бэлиэтээтэ. Бу сыллар усталарыгар элбэх көлүөнэ кырачааннары ааҕыы алыптаах эйгэтигэр уһуйан, угуйан, үгүс билиини-көрүүнү биэрэн, кэрэҕэ-үтүөҕэ үөрэтэн, элбэх интэриэһинэй оҕону сайыннарар дьаһаллары тэрийэн, олох хаамыытын ирдэбилинэн саҥаны, сонуну үлэтигэр киллэрэн өрөгөйдөөх үбүлүөйүн көрсөрүнэн, бэйэтин ааҕааччылара, төрөппүттэр уонна бииргэ үлэлэһэр эйгэлэрэ иһирэх махталларын тириэртилэр. Оҕо бибилэтиэкэтин үлэтин сырдатар бэртээхэй быыстапканы кэлбит ыалдьыттар биһирээн билистилэр. Кэлбит ыалдьыттар анаан оҥоһуллубут мольбертка бэйэлэрин баҕа санааларын уруһуйдаан өйдөбүнньүк хааллардылар уонна интэриэһинэй, аныгылыы көстүүлээх фотозонаҕа хаартыскаҕа түһэн астыннылар.
Истиҥ эҕэрдэ тылларын анаатылар Чурапчы улууһун баһылыгын солбуйааччы А.Г.Лобанов, Чурапчы тыа сирин түөлбэтин баһылыга В.Д.Сивцев, Улуус култууратын управлениятыттан Д.Д.Попов, үөрэх управлениятын специалиһа М.С.Артемьева, оскуола бибилэтиэкэрдэрэ, араас кэмнэргэ оҕо бибилэтиэкэтигэр үлэлээбит бэтэрээннэр уонна оскуола иннинээҕи саастаах оҕо уһуйааннара. Кинилэр бары бу бибилэтиэкэни кытта уһун кэмҥэ бииргэ ыкса үлэлэһэр тэрилтэлэрэ буолаллар. Бырааһынньыгы бэйэлэрин музыкальнай ньүөмэрдэринэн киэргэттилэр С.А.Новгородов аатынан Чурапчы орто уонна А.П.Гоголев аатынан оҕо искусствотын оскуолаларын үөрэнээччилэрэ, ону тэҥэ “Радость” оҕону сайыннарар киин иитиллээччилэрэ. Түмүккэ үбүлүөй бэлиэтэ улахан, кырасыабай торт тэрээһин кыттыылаахтарын үөрүүлэрин үрдэттэ.
