Балаҕан ыйын 20 күнүгэр Чурапчы аграрнай-техническэй кэллиэһигэр Одьулуун нэһилиэгэр «Президентский фонд культурных инициатив» гранын ылбыт «Норуот кэскилэ — тылыгар» бырайыак чэрчитинэн төгүрүк остуол буолан ааста.

Манна бырайыак ис хоһоонун, сыалын, кимиэхэ аналлааҕын барытын чопчу кэпсээтилэр. Устудьуоннары кытта ыкса үлэлээн 2024 c. А.С. Пушкин «Евгений Онегин» хоһоонунан суруллубут арамаанын Г.И. Макаров-Дьуон Дьаҥылы сахалыы тылбааһын аудио-кинигэ тахсара былааннанар. Ол чэрчитинэн, ааҕыы култууратыгар маастар кылаастар, хоһоон тылбааһыгар тылбааска холонуу уонна араас күрэхтэр ыытыллыахтара.

Кэллиэс устудьуоннара, үлэһиттэрэ, бибилэтиэкэ үлэһиттэрэ, нэһилиэк көхтөөх олохтоохторо кыттыыны ыллылар. Төрүт тылбыт туругун, сайдыытын туһунан бэйэлэрин санааларын үллэһиннилэр. 

Төгүрүк остуолу кэллиэс устудьуона Вячеслав Прокопьев саха тылын туһунан хоһоонунан түмүктээтэ.