Атырдьах ыйын 4 күнүгэр саха норуотун сүдү киһитэ судаарыстыбаннай,  политическэй диэйэтэл,  СӨ Бастакы Президенэ  Михаил Ефимович Николаев олохтон туораабыта 1 сыла.

  Михаил Ефимович саха норуотун  кэскилин түстээбит, өрөспүүбүлүкэбит сайдар саҥа суолларын  арыйбыт, сүҥкэн оруоллаах бырайыактары олоххо киллэрбит, тирэх- олук буолбут сүдү киһибит.  1991 сыллаахха норуот бүттүүн куоластааһынан Саха Өрөспүүбүлүкэтин Бастакы Президенинэн талыллан норуотун  туһугар бэриниилээхтик  үлэлээбитэ. Кини олоҕо уонна  үлэтэ  өрөспүүбүлүкэ экономиката сайдарыгар, нэһилиэнньэ олоҕо тупсарыгар, доруобуйа харыстабыла, тыа хаһаайыстыбата, промышленность, үөрэх, наука, култуура, спорт, төрөөбүт тылбыт  сайдалларыгар анаммыта. Бастакы Президеммит, ытык киһибит  олоҕо  саха норуотугар, дьонугар-сэргэтигэр, үүнэр ыччакка  үйэлэргэ  холобур буолар.

  Улуустааҕы  киин  библиотекаҕа   СӨ Бастакы Президенэ, Россия бөдөҥ судаарыстыбаннай, политическэй диэйэтэлэ  М.Е Николаев олоҕун уонна үлэтин сырдатар, кэрэһэлиир  кинигэлэри   “ Норуотун сайдыытын  түстээбитэ “   быыстапкаҕа  көрөргүтүгэр, ааҕаргытыгар  ынырабыт.

“Николаев-Центр” СӨ Бастакы Президенин библиотекатын сайтыгар М.Е.Николаев туһунан матырыйааллары көрүҥ, чулуу киһи дьоһун олоҕун туһунан элбэҕи ааҕыҥ, билиҥ!

https://nikolaevcentre.ru/biography