Николай Николаевич Колесов — Дьүһүй «Айылҕа сүрэҕим абылаҥа» быыстапкатын арыллыыта

Алтынньы 21 күнүгэр Е.А.Борисов аатынан киин бибилэтиэкэ саалатыгар Чурапчы улууһун норуотун маастара, Бочуоттаах бэтэрээнэ, Хатылы нэһилиэгин бочуоттаах олохтооҕо, үлэ бэтэрээнэ, айылҕаттан айдарыылаах уруһуйдьут Николай Николаевич Колесов — Дьүһүй «Айылҕа сүрэҕим абылаҥа» быыстапкатын үөрүүлээх арыллыыта буолла. Быыстапкаҕа Николай Николаевич оҕо эрдэҕиттэн олоҕун тухары уруһуйдаабыт хартыыналара уопсайа 60 тахса үлэ турда. Манна төрөөбүт дойдуга таптал, айылҕа кэрэ көстүүтэ, кыыла, көтөрө, дьыл араас кэмэ көстөр. Тэрээһин арыллыытыгар Хатылы нэһилиэгин олохтоохторун аатыттан Көһөрүллүү түмэлин сэбиэдиссэйэ М.В.Чичигинарова, ону тэҥэ бииргэ үөрэммит оҕолоро, үөлээннээхтэрэ, алтыспыт чугас дьоно бэйэлэрин эҕэрдэлэрин эттилэр, баҕа санааларын тириэртилэр. Кэлбит дьон быыстапканы олуһун сэргээтилэр, астыннылар.

Быыстапка алтынньы 29 күнүгэр диэри туруоҕа. Кэлин, көрүҥ, сэргээҥ диэн ыҥырабыт.