Е.А.Борисов аатынан улуустааҕы киин библиотекаҕа алтынньы 11 күнүгэр биир дойдулаахпыт Нуучча географическай уопсастыбатын, Арассыыйа суруналыыстарын, СӨ суруйааччыларын, СӨ уустарын сойуустарын чилиэнэ, СӨ норуотун маастара, кыраайы үөрэтээччи, Хатылы нэһилиэгин Бочуоттаах олохтооҕо Николай Николаевич Аржаков – Боло Уус «Омоҕой омоонунан» диэн саҥа 13-с кинигэтин сүрэхтэниитэ буолан ааста. Бу кинигэ «Алаас» кинигэ кыһатыгар 100 экземплярынан бэчээттэнэн таҕыста диэн Боло Уус  кэлбит ыалдьыттарыгар, сэҥээрээччилэригэр сырдатан кэпсээтэ.Кинигэ киэҥ ис хоһоонноох: манна олоххо буолбут түбэлтэлэртэн кэпсээннэр киирбиттэр, автор кэргэнэ, географическай наука доктора Светлана Кирилловна ыарахан ыарыыны аахсыбакка наукаҕа улахан үлэни оҥорон хаалларбытын, кырдьыгын чиэһин турууласпытын билиһиннэрэр, таптал таабырына сырдатыллар. Ону тэҥэ Манчаары туһунан сорох биллибэт түгэннэр, Саха хомуһугар уонна быһаҕар аналлаах научнай хабааннаах ыстатыйалар киирбиттэр.Кинигэ ис хоһоонун уратытынан бэлиэтиэххэ сөп «Омоҕой омоонунан» диэн автор хоһоонунан айымньытыгар олорон кэлбит олохпутун ойуулаан баран инники олохпутугар туох моһоллор күүтүөхтэрин ону бөлүһүөк суруйааччыбыт А.Е.Кулаковскай- Өксөкулээх Өлөксөй сүбэтинэн хайдах туоруохха сөбүн анаарбыт.Чурапчы улууһун культуратын управлениятыттан, А.А. Саввин аатынан История этнография музейыттан, Чурапчытааҕы  литературнай түмсүүттэн, Хатылы нэһилиэгиттэн уонна автор доҕотторо, билэр дьоно кыттыыны ыллылар, истиҥ эҕэрдэлэрин тиэртилэр.Музыкальнай оскуола «Кустук» фольклорнай бөлөҕө, салайааччы Розалия Петрова,”Айар кыл” кырыымпаһыттар бөлөхтөрө музыкальнай эҕэрдэлэринэн корсуһүүнү сэргэхситтилэр.