Үүммүт саҥа сылга Е.А.Борисов аатынан киин бибилэтиэкэҕэ нэдиэлэ устата буолан ааспыт тэрээһиннэри сырдатабыт.

• Тохсунньу 10 күнүгэр Чурапчы чулуу киһитэ, биир дойдулаахпыт, айылҕаттан айдарыылаах, Аан дойдуга аатырбыт график, РСФСР уонна Саха сирин норуодунай худуоһунньуга Афанасий Петрович Мунхалов төрөөбүтэ  90 сылыгар анаммыт “Мунхалов планетата” арт-галерея фондатыттан “Саха Сарсыҥҥылаах Санаалара” диэн сүдү күүстээх эйгэлээх, худуоһунньук бэйэтэ айан хаалларбыт  хартыыналарын көһө сылдьар быыстапкатын аһыллыыта саҥа сылга бастакы улахан, элбэх сэҥээрээччини муспут тэрээһининэн буолла.
• Тохсунньу 16 күнүгэр киин бибилэтиэкэҕэ «Каллиграфическай буочар» диэн кыраһыабайдык, таба суруйууга бэйэни тургутунуу куонкуруһа ыытылынна. Куонкуруска уопсайа 22 киһи кэлэн бэйэлэрин холонон көрдүлэр. Тургутунууга биир дойдулаахпыт, норуодунай суруйааччы В.Н.Егоров- Тумарча «Одьулууннар» диэн кинигэтиттэн ылыллыбыт тиэкиһи уһулан ыраастык, сыыһата суох, кыраһыабай буочардарынан суруйдулар. Тургутукка кыттыбыттарыттан дьон астыннылар, сэҥээрдилэр.
• Эмиэ бу күн Н.Д.Субуруускай аатынан Болтоҥо орто оскуолатын 11 кылааһын үөрэнээччилэрэ Е.А.Борисов архыып бибилэтиэкэтин билистилэр. Бөдөҥ государственнай, политическэй деятель, биир дойдулаахпыт олоҕун, үлэтин уонна архыып бибилэтиэкэ фондатын туһунан киэҥ информацияны ыллылар.
• Тохсунньу 17 күнүгэр киин бибилэтиэкэ былассааккатыгар улуус оскуолаларын кылаастарын салайааччыларыгар аналлаах семинар буолан ааста.
• Ону тэҥэ Хоптоҕо нэһилиэгин ытык кырдьаҕаһа, үлэ, тыыл бэтэрээнэ Клавдия Никифоровна Данилова уонна Григорий Гаврильевич Тимофеев анаан-минээн Диринтэн архыып-бибилэтиэкэни көрө, билсэ киирэ сырыттылар. Е.А.Борисов архыып-бибилэтиэкэтин интэриэһиргээтилэр, сэргээтилэр. Үлэһиттэргэ сиһилии кэпсээннэрин иһин махталларын биллэрдилэр.
• Бу күн “Үүн-сайын” медиалабораторияҕа  “Волшебные кисточки” уочараттаах дьарыга буолла. Куруһуок салайааччыта Анастасия Васильевна Собакина.
• Киин бибилэтиэкэ ааҕар саалатыгар ыытыллыбыт Таҥха күнүгэр аналлаах тэрээһин нэдиэлэни түмүктээтэ. Бу күн бибилэтиэкэ сүрүн исписэлиистэрэ М.Н.Захарова уонна В.Е.Маркова кэлбит дьоҥҥо анаан араас тэрээһиннэри ыыттылар, ол курдук таҥхаҕа аналлаах кинигэ быыстапката, ону тэҥэ таҥха туһунан кэпсээннэри ааҕан иһитиннэрии уонна «Баҕа санаа каартатын» оҥотторуу, дьон баҕатынан Николай Якутскай «Төлкө» диэн кинигэтин туһанан билгэлээһиннэр буоллулар. Саха үгэһин интэриэһиргиир, билиэн-көрүөн баҕалаахтар тэрээһини биһирээтилэр.