Е.А.Борисов аатынан киин бибилэтиэкэҕэ нэдиэлэ устата ыытыллыбыт тэрээһиннэри билиһиннэрэбит.        Сэтинньи 25 күнүгэр  Олоҥхо күнүнэн Чурапчы улууһугар Олоҥхо декадатын үөрүүлээх аһыллыыта буолла. Бу күн биллиилээх олоҥхоһут  И.Г.Теплоухов –Тимофеев төрөөбүтэ 155 сылыгар уонна бөдөҥ фольклорист В.Ф. Ермолаев 95 сылыгар аналлаах улуустааҕы «Чурапчы олоҥхоһуттара» научнай — практическай конференция ыытылынна. Манна олоҥхону сэҥээрээччилэр, олоҥхону сөбүлээн толорооччулар, үөрэтээччилэр бэйэлэрин дакылааттарынан кытыннылар. «Олоҥхо өрөгөйө-саха саргыта» диэн киэҥ ис хоһоонноох кинигэ быыстапката туруорулунна, ону тэҥэ Кытаанах нэһилиэгиттэн баһылык Е.Н.Потапов көҕүлээһининэн биллиилээх худуоһунньук Иннокентий Пестряков олоҥхо тиэмэтигэр уус-уран уруһуйдарын быыстапката тэриллибитэ дьон сэҥээриитин ылла.        Олоҥхо декадатын чэрчитинэн Чурапчытааҕы киин бибилэтиэкэҕэ 15 киһи кыттыылаах  “Олоҥхо-2024” диктана буолла.        С.А.Новгородов аатынан оскуола 7-11 кылаас оҕолоругар «Олоҥхо дойдутугар айан» диэн олоҥхону кытта билсии  уруоктара ыытылынна. Олоҥхо туһунан интерактивнай оонньууну оҕолор сүрдээҕин сэҥээрэн оонньоотулар.        С.К. Макаров аатынан Чурапчытааҕы гимназия 8 кылааһын үөрэнээччилэрэ Е.А.Борисов архыып бибилэтиэкэтигэр сырыттылар. Бөдөҥ государственнай, политическэй деятель, биир дойдулаахпыт олоҕун, үлэтин уонна архыып бибилэтиэкэ фондатын билистилэр.        Улууска сыллата бэлиэтэнэр тыа хаһаайыстыбатын күнүгэр аналлаах «Идэһэ-2024» бырааһынньыгын чэрчитинэн Е.А.Борисов аатынан киин бибилэтиэкэҕэ «Свое родное” диэн тыа хаһаайыстыбатын оҥорон таһаарар салаатын үлэһиттэригэр аналлаах воркшоп семинары тыа хаһаайыстыбатын управленията тэрийэн ыытта.        Сэтинньи ый 28 күнүгэр  РСФСР уонна Саха АССР народнай артыыһа П.М.Решетников аатынан Чурапчытааҕы нороднай театр 55 сылынан «Умнуллубат уобарастар” диэн ахтыы-сэһэргэһии киэһэтэ буолла. Театр быыһа аһыллыаҕыттан артыыстаабыт биллэр-көстөр дьоннорбутун аймах-билэ дьонноро ахтан-санаан аастылар.        Бу нэдиэлэҕэ Чурапчы нэһилиэгин дьаһалтатын “Удьуор утума” тэрээһинигэр нэһилиэк үс ТОС-тарыттан холобур буолар үтүө ыаллар бибилэтиэкэҕэ түмсэн бэйэлэрин дьиэ кэргэттэрин утумун, үгэстэрин билиһиннэрдилэр.      А.П.Гоголев аатынан оҕо искусствотын оскуолатын театральнай кылааһын үөрэнээччилэрэ  Е.А.Борисов архыып бибилэтиэкэтигэр сырыттылар, бөдөҥ государственнай деятель биир дойдулаахпыт олоҕун, үлэтин туһунан билиилэрин-көрүүлэрин кэҥэттилэр.       «Үүн-сайын» медиалабораторияҕа «Волшебные кисточки» куруһуокка уруһуйу умсугуйааччылар маастар кылааска дьарыктаннылар. Куруһуок салайааччыта Собакина Анастасия Васильевна.