Е.А.Борисов аатынан киин бибилэтиэкэҕэ нэдиэлэ устата ыытыллыбыт тэрээһиннэри билиһиннэрэбит.Сэтинньи ый 19 күнүгэр Чурапчы улууһугар “Образование – основа устойчивого развития ” диэн 2-с илин эҥэрдээҕи улуустар үөрэхтээһиҥҥэ форумнара буолла. 7 улуустан 200-тэн тахса киһи кэлэн, икки күн устата үөрэхтээһиҥҥэ тирэҕирэн, тыа сирин сайдыытын тула киэҥ ырытыһыылаах  кэпсэтиини ыытан астынан тарҕастылар. Бу форумҥа илин эҥэр улуустарын баһылыктара, баһылыктары солбуйааччылара, үөрэх управлениятын салайааччылара, оскуола дириэктэрдэрэ, учууталлара, детсад үлэһиттэрэ кыттыыны ыллылар. Улуустартан кэлбит делегацияларга Е.А.Борисов аатынан киин бибилэтиэкэҕэ экскурсиялар буоллулар, ону тэҥэ Е.А.Борисов архыып-бибилэтиэкэтин үлэтин билистилэр. Күн иккис аҥарыгар киин бибилэтиэкэҕэ үөрэхтээһин форумун “Тыл – омук тыына” диэн биир сүрүн былаһаакката үлэлээтэ. Манна кытыннылар, сүрүн дакылааттары оҥордулар Саха Өрөспүүбүлүкэтин Наука академиятын төрүт тылы үөрэтэр, харыстыыр уонна сайыннарар киин салайааччыта Феодосия Габышева, улуус баһылыга Степан Саргыдаев. Туруоруллубут боппуруос тула киэҥ кэпсэтии ыытылынна.Киин бибилэтиэкэ “Үүн сайын” медиалабораториятыгар аҕам саастаахтарга компьютерынан туһаныыга үөрэх куруһуогун дьарыга ыытылынна. Маннык дьарыктар былааннаахтык сыл устата ыытыллыахтара.Сэтинньи 21 күнүгэр «Иэйиибин эһиэхэ аныыбын» диэн айар куттаах дьону түмэр доруобуйаларынан хааччахтаах дьоҥҥо бэрт сэргэх тэрээһин буолла. Бу күн кэлбит ыалдьыттар бэйэлэрин талааннарын көрдөрөн ыллаан-туойан, хоһоон ааҕан, сэһэргэһэн, сэргэхсийэн тарҕастылар.Нэдиэлэ устата бибилэтиэкэ-архыыпка улуус оскуолаларыттан, тэрилтэлэриттэн  кэлэннэр үгүс киһи экскурсияҕа сырыттылар, бибилэтиэкэни кытта билистилэр