«Навигатор-2026» өрөспүүбүлүкэтээҕи библиотечнай профсоюзнай форум
Кулун тутар 13 күнүгэр Арассыыйа Норуоттарын сомоҕолоһууларын уонна СӨ Култуура сылын чэрчитинэн өрөспүүбүлүкэ бибилэтиэкэлэрин уонна профсойуустарын «Навигатор -2026» форума ыытылынна. Форумҥа Амма, Бүлүү, Нам, Өлүөхүмэ, Сунтаар, Таатта, Хаҥалас, Чурапчы улуустарыттан уонна Дьокуускай куораттан 100-тэн тахса киһи кыттыыны ылла. Киэҥ хайысхалаах улахан тэрээһини Дьокуускай куорат бибилэтиэкэтин ситимэ уонна профсойууһа тэрийдилэр. Форум Н.Д. Неустроев аатынан «СМАРТ» — бибилэтиэкэҕэ ыытылынна. Чурапчытааҕы кииннэммит бибилэтиэкэ ситимиттэн 5 үлэһит кыттыыны ылла.
Форум бастакы түһүмэҕэр библиотекардар 6 хайысхаҕа бэйэлэрин үлэлэрин, бырайыактарын СӨ Национальнай бибилэтиэкэтин научнай-методическай киинин кылаабынай бибилэтиэкэрэ, Сардана Евдокимова бэрэссэдээтэллээх экспертнэй хамыыһыйаҕа көмүскээтилэр. Бу былаһааккаҕа биир идэлээхтэрбит ааҕыыны көҕүлүүргэ туһуламмыт олус интириэһинэй араас интерактивнай оонньуулары, экскурсиялары, электроннай ресурсалары, оҥорон таһаарар кинигэ бородууксуйаларын, анимацияҕа ойулуктары бииртэн биир сонун бырайыактары көрдөрдүлэр. Иккис түһүмэххэ профсойуус үлэтигэр уопут, санаа атастаһыытын семинара буолла. Профсойуус кэлэктииби түмэр, сомоҕолуур үлэтигэр элбэх суолталаах, туһалаах информацияны ыллылар.Форум үһүс түһүмэҕэр “Хомуур күрэх» сэргэх спортивнай оонньуу ыытылынна. Хамаандаттан иккилии киһи бириэмэҕэ кубиктары түргэнник хомуйууга күрэхтэстилэр. Күрэҕи оонньуу ааптара Владимир Емельянов бэйэтэ салайан ыытта. Форумҥа биһиги коллегаларбыт Кытаанах библиотекатын сэбиэдиссэйэ Лена Пономарева нэһилиэгин дьонун сырдатар «Золотой фонд Кытанахского наслега», “Читаймер” бырайыактара, Одьулуун библиотекатын сэбиэдиссэйэ Таисия Григорьева Д.И.Дьячковскай-Сэһэн Боло олоҕун, айар үлэтин билиһиннэрэр лото оонньуута сэҥээриини ыллылар, киин библиотекаттан Вероника Маркова «Эмтээх от» бырыайыга үгүс дьон болҕомтотун тарта. Форум түмүгэр үөрүүлээх быһыыга-майгыга хайысхаларынан кыайыылаахтары наҕараадалаатылар, дипломнары туттардылар. Ол курдук бырайыактары көмүскээһиҥҥэ Чурапчытааҕы оҕо библиотекатын сэбиэдиссэйэ Ольга Эверстова «Творческие и досуговые мероприятия» хайысхаҕа «Библиоканикулы» оҕо сайыҥҥы ааҕыы лааҕыра уонна «Проекты по сохранению родных языков» хайысхаҕа «Төрөөбүт тыл биһигэ» киин үлэтин бырайыактара III миэстэни ыллылар. «Издания и продукты, разработанные библиотеками» хайысхаҕа Чурапчытааҕы кииннэммит библиотечнай ситим профсойууһун бэрэссэдээтэлэ Саргылана Флегонтова Е.А.Борисов аатынан киин библиотека уонна улуус культураҕа управлениятын тэрийиилэринэн ыытыллар «Культурологическай ааҕыылар» НПК бырайыага II миэстэни ылла.Үрдүк тэрээһиннээх форумҥа биир идэлээхтэр билсэн, кэпсэтэн, санаа атастаһан бибилэтиэкэ уонна профсойуус үлэтигэр-хамнаһыгар олус туһалаах саҥа, сонун идеялары көрөн, билэн, өссө да маннык тэрээһиннэр ыытылла туралларыгар тэрийээччилэргэ махтанан, бары кыттааччылар олус астынан тарҕастылар.
