Кулун тутар 29 күнүгэр Е.А.Борисов аатынан киин бибилэтиэкэҕэ «Мырыла. Соловьев нэһилиэгин историята» диэн кинигэ сүрэхтэниитэ буолан ааста. И.Г. Собакин аатынан түмэл салайааччыта, Саха Өрөспүүбүлкэтин үөрэҕириитин туйгуна, кыраайы үөрэтээччи Иннокентий Иннокентьевич Собакин кинигэни бастакы уонна иккис томанарын хомуйан оҥорбут.«Мырыла. Соловьев нэһилиэгин историята» кинигэ бастакы, иккис томнара Дьокуускай куоракка «Дани-Алмас» кинигэ кыһатыгар 70*90/1 гыммыт 16 форматтаах 100 экземплярынан, бастакы том 492 страницалаах бэчээттэнэн тахсыбыт. Кинигэ обложката халыҥ переплеттаах Тэйэр Хайа үрдүттэн түһэриллибит көстүүгэ Маталах хочотун, Көбдөх хайатын аннынан Тэниэдэ уонна Туолума үрэхтэр субуллар кэрэ көстүүтэ обложканы киэргэтэр. Титульнай илиискэ кинигэ аата тома, ханна тахсыбыта, издетельствата, тахсыбыт сыла суруллубут. Кинигэ тиэкиһэ элбэх хаартысканан ситэриллэн кинигэ ис хоһоонун ситэри арыйбыт.Кинигэ аннотацията — нэһилиэк былыргы историятыттан саҕалаан, аныгы кэм туһунан кэпсиир кинигэ бу иннинэ тахсыбыт кинигэлэр матарыйаалларыттан уонна эбии ахтыылартан таҥыллан оҥоһуллубут. Маны таһынан И.Г.Собакин аатынан нэһилиэк түмэлин архыыбыттан хаартыскалар, ахтыылар киирбиттэр. Мырыла Нестор Саввич Соловьев аатынан туспа нэһилиэк  быһыытынан 1932 с.  тэриллибитэ 90 сылыгар, Максим Николаевич Сибиряков төрөөбүтэ 90 сылыгар ананар. Ааҕааччы киэҥ араҥатыгар ананар диэн суруллубут.Бу үөрүүлээх түгэҥҥэ Чурапчы улууһун баһылыгын социальнай боппуруостарга солбуйааччы М.Ф.Кронникова, Үөрэх управлениятыттан профсойуус бэрэссэдээтэлэ Е.И.Давыдов, Улуус култууратын управлениятын салайааччыта П.Е.Гуляев, Чурапчытааҕы А.А.Саввин аатынан история уонна этнография түмэлин салайааччыта А.А.Захаров, Мырыла нэһилиэгин баһылыга  В.И.Собакин, биир дойдулаахтара,  кыраайы үөрэтээччилэр дойдуларын историятын сырдатар биир киэҥ ис хоһоонноох кинигэ тахсыбытыттан астынан туран бэйэлэрин санааларын үллэһиннилэр, истиҥ тылларын тириэртилэр.