Аҕа дойду улуу сэриитин  кыттыылааҕа, «Кыһыл сулус» бойобуой орден кавалера, РСФСР үөрэҕириитин туйгуна, Саха АССР культуратын үтүөлээх үлэһитэ, Чурапчы оройуонун бочуоттаах гражданина, суруйааччы, тылбаасчыт Гавриил Дмитриевич Ефимов төрөөбүтэ 100 сыллаах үбүлүөйүн бэлиэтиибит. Бу үбүлүөйү көрсө  Г.Д. Ефимов оҕолоро «Гавриил Дмитриевич Ефимов» диэн кинигэни бэчээттэтэн таһаардылар.  Кинигэ Дьокуускайга “Алаас” издательствоҕа “Саха сирин үтүөкэн дьоно” серия чэрчитинэн тахсыбыт. 2005 сыллаахха “Алаас уола Аратаа” диэн Г.Д. Ефимов олоҕун, үлэтин, бойобуой суолун архив көрдөрүүлэригэр, суруктарга, дневниктэргэ, ахтыыларга, ыстатыйаларга олоҕуран сырдатар улахан кинигэни кини быраата Н.И. Ефимов хомуйан таһаарбыта. Бу  саҥа кинигэ ити эрдэ бэчээттэммит кинигэни кэҥэтэн, эбии матырыйааллары, хаартыскалары, Гавриил Дмитриевич хоһооннорун, тылбаастарын, кини үөрэнээччилэрин ахтыыларын уонна кини аатын үйэтитиигэ ыытыллар үлэлэр тустарынан киллэрэн саҥалыы хат бэчээттэтэн таһаарыы буолар.

Биэчэргэ Гавриил Дмитриевич оҕолоро, чугас дьоно, бииргэ үлэлээбит үөлээннээхтэрэ,төрөөбүт түөлбэтиттэн- Одьулуун нэһилиэгин делегацията, улуус общественноһа кыттыыны ыллылар, ахтан-санаан аастылар. Гавриил Дмитриевич- эрэллээх доҕор, хорсун буойун, опыттаах учуутал, сайаҕас-сэргэх салайааччы, инициативалаах общественник, төрөөбүт дойдутун дьиҥнээх патриота, тапталлаах кэргэн, аҕа, улахан дьиэ-кэргэн аҕа баһылыга, ыраас, сырдык, чаҕылхай олоҕу олорбут киһи буоларын бу ахтыы биэчэрэ өссө төгүл бигэргэттэ. Бу киэһэни Гавриил Дмитриевич хоһоонноро, ырыалара өссө байытан, киэргэтэн биэрдилэр. Биэчэри улуустааҕы кииннэммит библиотечнай ситим директора В.А.Платонова ыытта.