Кыһалҕа
- Алҕаска бүдүрүйбүт тайаммыт суолун хаалларбакка көнүөхтээх.
- Биирдэ айахха киирбичэ тыллаһыы олоххо содуллаах.
- Быһымахтык быһаарыныы судургу, кэмсиниитэ кэтэхтээх.
- Бэлиитикэ көстүбэт кутуруга суоһарар охсуулааҕын умнума.
- Кыаҕы таһынан айылгы ситимэ ыыппат.
- Кыах иһинэн сылдьар эрэллээх.
- Кыһалҕа кыттыгастаах. Эрэй эҥээрдэспэккэ сатаан сылдьыбат.
- Кыһалҕата суох олох икки атахтааҕы кэтэһиннэрбэтэх.
- Кыһалҕаттан сир өтөн төлөрүйбэккин.
- Мунуу-тэнии кыһалҕалаах олох арахсыбат аргыһа.
- Олох кыһалҕалаах буолан дьону кытаахтаһыннарар.
- Олох оҥкуллаах оҕуруга – сатабылынан сүүйүү.
- Олох көстүбэт сыһыанын сүүрээнэ ардыгар кэтэһиннэрбэккэ нүөлүтэр кыдыьыктанар.
- Олох соҕотох киһиэхэ ситиһиллибэтэх умсулҕан умнуллубат.
- Саха урааҥхай этин бааһынааҕар көстүбэккэ көһүөркүүр уйулҕатын бааһа уһуннук бүтэйбэккэ эрэйдиир.
- Соһуччу оһол судургу.
- Сор содула соһунньаҥнаах, эрэй эҥээрэ сэнньэлгэлээх.
- Сэт сиэтиилээх.
- Содуллаах сонун состоруулаах.
- Тирбэҕэ туһалыыр сиринэн быстар.
- Тохтубут хаан ханыы тардыылаах.
- Төннөн төрөөбүт төттөрү төлкөлөөҕүҥ ханыы тардыылаах.
- Туора киһи кыһалҕатынан олорботтор. Кыһалҕа туһунан аналлаах, чаастаах.
- Кыһалҕа төлөрүтүллэр буолан олох салҕанар. Төлөрүтүллүбэт кыһалҕаны үрдүк Айыылар айбаттар.
- Үгүстүк сэрэхэдийээччи оһолго соһуччу түбэһэр.
- Эрэй-буруй эҥээрдээх олоҕу бэйэҕэ эрэлинэн чэпчэтэллэр.
- Чараас эккэ тахсан бүтэйбит баас чэрэ хараҕы уһуннук аалар.
- Ханна да тиий, кыһалҕа кыһарыйыыта биир.
- Холус сыһыан хардата суох хаалбатын умнума.