Тохсунньу 15 күнүгэр Е.А.Борисов аатынан Чурапчытааҕы киин бибилэтиэкэҕэ Аан дойдутааҕы илиинэн суруйуу күнүгэр анаммыт «Каллиграфическай буочар» диэн кыраһыабайдык, таба суруйууга бэйэни тургутунуу куонкуруһа буолан ааста.  Куонкуруска уопсайа 22 киһи кэлэн бэйэлэрин холонон көрдүлэр. Бибилэтиэкэ ааҕааччыны кытта үлэлиир салаатын исписэлииһэ М.Н.Захарова кэлбит кыттааччыларга тургутук ирдэбиллэрин билиһиннэрдэ, илиинэн суруйуу туһунан сырдатан кэпсээтэ. Тургутунууга биир дойдулаахпыт, норуодунай суруйааччы В.Н.Егоров- Тумарча 90 сааһын көрсө «Одьулууннар» диэн кинигэтиттэн ылыллыбыт тиэкиһи уһулан ыраастык, сыыһата суох, кыраһыабай буочардарынан суруйдулар. Куонкурус түмүгүнэн наҕараадаланнылар: 1-кы степеннээх дипломунан — Анна Платонова, 2-с степеннээх дипломунан —  Лилия Степанова уонна 3 степеннээх дипломунан — Ирина Джанкабулова.  Ону тэҥэ «Каллиграфия маастара» диэн анал ааты кыттааччылартан саамай аҕам саастаах Иван Петрович Пономарев уонна «Кыраһыабай буочар» диэн анал ааты Надежда Ивановна Говорова ыллылар. С.А.Новгородов аатынан Чурапчы орто оскуолатын 4″а» кылааһын үөрэнээччилэрэ Алиса Егорова, Валя Илларионова, Тимур Васильев, Аня Килибеева кыттыыны ыланнар, ыраас, кыраһыабай буочардарынан, таба суруйууларынан кэлбит дьону сөхтөрдүлэр, кинилэргэ бибилэтиэкэ анал бирииһэ туттарылынна. Инники бу күрэскэ кыайбыт кыттааччылар үлэлэрэ, норуодунай суруйааччы В.Н.Егоров- Тумарча олоҕун, үлэтин сырдатар уонна киһи буочарынан майгытын сигилитин быһаарар графология, психографология диэн наукалар сэдэх кинигэлэрэ —  быыстапкалара турдулар. Дьүүллүүр сүбэ түмүк таһаарар кэмигэр Чурапчы туһунан С.К. Флегонтова ыйытык оонньуутугар көхтөөхтүк кытыннылар.  Тургутукка кыттыбыттарыттан дьон астыннылар, сэҥээрдилэр. Инникитин даҕаны маннык интэриэһинэй бэйэни тургутунуу тэрээһиннэригэр көхтөөхтүк кыттар буолун диэн нэһилиэкпит олохтоохторун ыҥырабыт.