IV норуоттар икки ардыларынааҕы библиографическай конгресс
Балаҕан ыйын 16-19 күннэригэр Дьокуускай куоракка СӨ Национальнай библиотеката тэриллибитэ 100 сылыгар анаммыт IV норуоттар икки ардыларынааҕы библиографическай конгресс «Библиография в сохранении культурного наследия и языкового многообразия народов мира» ыытылынна. Бу улахан конгресска Россия 81 регионуттан уонна 16 тас дойдуттан бэрэстэбиитэллэр кыттыыны ыллылар. Конгресс сүрүн сыалынан-соругунан аныгы кэмҥэ библиотекалар үлэлэригэр цифровой технологиялары киэҥник киллэрии, туһаныы, культурнай нэһилиэстибэҕэ харыстабыллаах сыһыан, үйэтитии уонна норуоттар икки ардыларынааҕы бииргэ үлэлээһиннэр туһунан сүрүн сессиялар уонна дискуссиялар ыытылыннылар. Конгресс 13 хайысханан үлэлээтэ. Киэҥ ис хоһоонноох , дириҥ научнай хабааннаах тэрээһиннэри сэргэ маастар кылаастар, төгүрүк остуоллар, ырытыылар ыытылыннылар. 4 күн устата өрөспүүбүлүкэбит бары библиотекаларыттан делегациялар бу улахан конгресска араас хайысхаларынан библиография билиҥҥи туругун, сайдыытын ырытыһан, дьүүллэһэн санаа атастастастылар. Дойду бөдөҥ библиотекаларын специалистара төгүрүк остуолларга, сессияларга санааларын эттилэр, бырайыактарын билиһиннэрдилэр. Конгресс биир улахан хайысхатынан бибилэтиэкэ эйгэтигэр оҥоһуу өйү киэҥник туһаныыны ырыттылар. Тэрээһиҥҥэ СӨ Национальнай бибилэтиэкэтин үлэһиттэрэ саҥа сүүрээни — ИИ инструменнарын, бырайыактарын киэҥ эйгэҕэ билиһиннэрдилэр. Конгресс бары кыттыылаахтара национальнай библиотека дойдуга библиотека эйгэтигэр саҥа цифровой технологиялары чахчы баһылаан ааҕааччылар информацияны толору хааччаҕа суох ылалларыгар улахан, далааһыннаах үлэни оҥорбуттарын сөҕөн-махтайан, улаханнык биһирээтилэр, үрдүк сыанабылы биэрдилэр. Чурапчы улууһун библиотечнай ситимин үлэһиттэрин делегацията бу улахан конгресска кыттыыны ылан, элбэх саҥаны, сонуну билэн-көрөн астынан кэллибит.
История кэрэһиттэрэ: СӨ Национальнай библиотеката тэриллибитэ 100 сылыгар
ССРС култууратын туйгуна, РСФСР култууратын үтүөлээх үлэһитэ, РФ Суруналыыстарын союһун чилиэнэ, култуура бэтэрээнэ Мария Андреевна Герасимова — Сэҥээрэ СӨ национальнай бибилэтиэкэтэ тэриллибитэ 100 сылыгар анаан Чурапчы улууһуттан төрүттээх СӨ Национальнай бибилэтиэкэтигэр таһаарыылаахтык үлэлээбит уонна билигин да үлэлии, айа-тута сылдьар үлэһиттэр тустарынан бэлэмнээбит ыстатыйаларын улууспут «Саҥа олох» хаһыатын 33- с, 34-с, 36-с, 37-с нүөмэрдэригэр ааҕыҥ! «Саҥа олох» хаһыат электроннай архивыгар сигэнэн киирэн ааҕыаххытын сөп: https://churlib.ru/arhiv/arhiv-gazet/?elib_paper=gazeta-sana-oloh&elib_year=2025
