Илларионов Спиридон Петрович — Бойуот

Поэт, Саха  Өрөспүүбүлүкэтин  суруйааччыларын Сойууһун чилиэнэ (2010). Экономическай наука кандидата, Россия  үрдүк профессиональнай үөрэхтээһинин Бочуоттаах үлэһитэ.

Спиридон Петрович Илларионов  1939 сыллаахха ыам ыйын 25 күнүгэр Чурапчы оройуонугар Хайахсыт нэһилиэгэр төрөөбүтэ. Хайахсыт сэттэ кылаастаах оскуолатыгар 1946 сыллаахха үөрэнэ киирбитэ. Биир сыл «Победа» холкуоска үлэлээн баран, 1958 – 1961 сс. Сэбиэскэй Армия кэккэтигэр сулууспалаабыта. Армияттан кэлэн баран Саха государственнай университетыгар тыа хаһаайыстыбатын факультетыгар үөрэнэ киирбитэ.1966 сыллаахха туйгуннук бүтэрэн ученай – зоотехник дипломун ылбыта. Икки сыл Эрилик Эристиин аатынан холкуос Чакырдааҕы учаастагар старшай биригэдьииринэн үлэлээбитэ.1968 – 1971 сс. ССРС тыатын хаһаайыстыбатын иһинэн баар Бүтүн Союзтааҕы научнай – чинчийэр Тыа хаһаайыстыбатын экономикатын институтын аспирантуратын үөрэнэн бүтэрбитэ. 1971 сылтан Саха сиринээҕи Тыа хаһаайыстыбатын научнай – чинчийэр институтугар научнай сотруднигынан үлэлээбитэ. 1972 сыллаахха «Лена – Амма зонатыгар сүөһү иитиитин интенсификациялааһын боппуруостара» диэн темаҕа кандидатскай диссертацияны көмүскээн экономическай наука кандидата буолбута. 40 – тан тахса научнай ыстатыйалардаах, методическай үлэлэрдээх. Тыа хаһаайыстыбатын Академиятыгар «Тулаһа» духуобунас киинигэр «Чокуур» диэн литературнай түмсүү чилиэнин буолар. «Угуйар уйулҕам» диэн бастакы кинигэтэ 2006 сыллаахха К.Д.Уткин  эрэдээктэрдээн  тахсыбыта. «Сэттэ ини – бии саллааттар» поэматын аймахтара Илларионовтар-Дарыбыанаптар биир дьиэ кэргэнтэн үөскээбит сэттэ ини – биилэр Аҕа дойду Улуу сэриитигэр кыттыыларын туһунан суруйбута. Иккис кинигэтэ «Хоболоох хоһооннор» диэн ааттанан 2008 сыллаахха, «Сүмэлээх кэһии» хоһооннорун хомуурунньуга 2014 сыллаахха тахсыбыттара. «ЯСХИ – ЯГСХА 20 сыла» өйдөбүнньүк мэтээлинэн 2005 сыллаахха наҕараадаламмыта. «Переселенец Чурапчинского улуса» знагы 1992 сыллаахха биэрбиттэрэ. 2010 сыллаахха Саха сирин суруйааччыларын союһун чилиэнинэн ылыллыбыта.

Айымньылара

Угуйар уйулҕам : хоһооннор / С.П.Илларионов – Бойуот ; [ Саха сиринээҕи тыатын хаһаайыстыбатын гос. акад., «Тулаһа» духуобунас киинэ, «Чокуур литературнай түмсүү; Киирии тылы суруйда К.Д. Уткин.] – Дьокуускай : Сайдам, 2009. – 144 с.

 Хоннохтоохтук саҕалааһын : Хоһооннор / С.П. Илларионов – Бойуот ; [лит. ред. К.Д. Уткин, ред. К.Д. Дьячковский]

 Хоболоох хоһооннор / С.П.Илларионов – Бойуот; ; [лит. ред. К.Д. Уткин, ред. К.Д. Дьячковский]– Дьокуускай : Сайдам, 2008. – 42 с.

 Күндү кэһии. Аалай кыһыл сардаана. Тойоннооһун. Соноҕос. Саха атыыр оҕуһа. Ыйдаҥа түүн. Муусукалаах омурҕан : хоһооннор / Бойуот // Чолбон. — 2013. — № 11. – С. 41 – 43.

Айар үлэтин олоҕун туһунан

 Илларионов Спиридон Петрович //Хайахсыт: Чурапчы улууһа / [хомуйан оҥордо М. А.Герасимова — Сэҥээрэ]. – Дьокуускай: Көмүөл, 2012. – С. 232 — 233.

Илларионов Спиридон Петрович // Чурапчыны ааттаппыт көһөрүллүү оҕолоро / Д.П. Чечебутов ; ред. А.М. Слепцов. – Чурапчы, 2015. – С.6-7.