«Ийээ, өллөхпүнэ ытаамаар» быыстапка аһыллыыта
Балаҕан ыйын 29 күнүгэр Е.А. Борисов аатынан киин библиотекаҕа РФ Суруналыыстарын сойууһун чилиэнэ, биир дойдулаахпыт Светлана Владимировна Диодорова-Лаврентьева тапталлаах уола, Чурапчы киэн туттар ыччата, гвардия младшай сержана, байыаннай медик, анал байыаннай дьайыыга хорсуннук охтубут Владимир Диодоров-Лаврентьев-Боб сырдык кэриэһигэр анаммыт «Ийээ, өллөхпүнэ ытаамаар…» быыстапка аһылынна.
Быыстапкаҕа Ийэ дойду көмүскэлигэр олоҕун толук уурбут, эдэркээн биир дойдулаахпыт сырдык аатын кэриэстии биир дойдулаахтара, эдэр ыччат,оскуола үөрэнээччилэрэ — үгүс киһи муһунна. Светлана Владимировна оҕотун туһунан истиҥник-иһирэхтик кыра сааһыттан саҕалаан, ыччат кэмин, анал байыаннай дьайыыга бойобуой сырыыларын туһунан, олорбут кылгас, чаҕылхай олоҕун сырдатта. Мустубут дьоҥҥо Вова олорбут олоҕо хаартысканан, видеороликтарынан көрдөрүллэн дьон өйүгэр-сүрэҕэр дириҥ өйдөбүлү хаалларда. Быыстапкаҕа анал байыаннай дьайыыга Вова кэтэ сылдьыбыт таҥаһа, тутта сылдьыбыт маллара, бойобуой наҕараадалара, дьонугар суруйбут суруктара, хаартыскалара, трофейдара туруоруллубуттарын ийэтэ дьоҥҥо сиһилии кэпсээн билиһиннэрдэ. Тэрээһин кэмигэр элбэх киһи бэйэлэрин санааларын үллэһиннилэр, билиҥҥи кэмҥэ маннык быыстапка Ийэ дойдуну таптыырга, бэриниилээх буоларга, хорсун санааланарга, ыччаты иитиигэ олус улахан суолталааҕын, үтүө холобур буоларын тоһоҕолоон бэлиэтээтилэр, дириҥ махталларын тиэртилэр.
Светлана Владимировнаҕа тапталлаах оҕотун Владимир уонна хорсун буойуннар сырдык ааттарын үйэтитиигэ болҕомтотун, Сахабыт сириттэн анал байыаннай дьайыыга сылдьар биир дойдулаахтарбытыгар кэмнэммэт улахан көмөтүн, кыһамньытын уурар уһулуччу суолталаах үлэтин үрдүктүк сыаналыылларын, сүгүрүйэллэрин биллэрдилэр.
Хорсун буойун Владимир Диодоров-Лаврентьев-Бобка анаммыт быыстапка улуустааҕы киин библиотекаҕа биир нэдиэлэ устата турар.
Күндү бар дьоммут быыстапканы кэлэн көрүҥ, сэргээн диэн ыҥырабыт!
