“Ийэ тылым сүмэтэ” күрэх түмүктэннэ
Олунньу 3 күнүттэн 13 күнүгэр диэри Ийэ тыл, сурук-бичик күнүн көрсө “Ийэ тыл сүмэтэ” улуустааҕы хоһоону айыы уонна ааҕыы күрэҕин кэтэхтэн Е.А.Борисов аатынан киин библиотека ыытта. Манна айар талааннаах дьон бэйэлэрэ суруйбут хоһооннорун ааҕан, видеоҕа устан ыыттылар. Барыта алта нэһилиэктэн: Алаҕар, Сылан, Кытаанах, Мырыла, Мындаҕаайы уонна Чурапчыттан кыттыыны ыллылар. Дьүүллүүр сүбэнэн: Е.А.Борисов аатынан киин бибилэтиэкэ Борисов киин отделын сэбиэдиссэйэ Вера Аполлоновна Платонова, “Чурапчы” литературнай түмсүү чилиэнэ, дьиэ кэргэҥҥэ уонна ыччакка социальнай, психологическай көмө киинин педагог-психолога Надежда Никифоровна Попова, Е.А.Борисов аатынан киин бибилэтиэкэ ааҕааччыны кытта үлэлиир отдел сэбиэдиссэйэ Елена Николаевна Дьячковская үлэлээтилэр. Дьүүллүүр сүбэ быһаарыытынан: Добун сурук I үрдэлэ туттарыллар Диодорова Лидия Петровнаҕа (Мындаҕаайы нэһилиэгэ), Добун сурук II үрдэлэ Игнатьева Пелагея Семеновнаҕа (Чурапчы нэһилиэгэ), Добун сурук III үрдэлэ Протодьяконова Софья Егоровнаҕа (Алаҕар нэһилиэгэ). “Айар абылаҥ” анал ааты Винокурова Мария Ивановна – Мааны Маарыйа (Кытаанах), “Көхтөөх кыттааччы” анал ааты Сандаар Күн Сандаара Сулус кыыһа (Чурапчы), “Иэйиилээх ааҕааччы” анал ааты Михайлова Мария Титовна – Тиит кыыһа Маарыйа (Сылан), “Уран тыл маастара” анал ааты Смирников Николай Федорович (Кытаанах), “Хомоҕой хоһуйааччы” анал ааты Дьячковская Саргылаана Аркадьевна – СаргыЛаана (Мырыла) , «Айымньыылаах ааҕааччы» анал ааты Павлова Мария Петровна (Мырыла) ыллылар. Дьүүллүүр сүбэ ордук Лидия Петровна оҥостон, тэринэн, айымньы ис туругун истээччигэ биэрэр гына, хомоҕойдук суруллубут хоһоонун өйтөн аахпытын, сценическай култууратын биһирээтэ. Кэлин бары кыттааччыларга сүбэ быһыытынан туран эрэ хоһоону ааҕарга, ааҕыллар миэстэ фонугар болҕомто уурарга уонна төһө кыалларынан өйтөн ааҕарга сүбэлииллэр. Бары күрэх кыттыылаахтарыгар, салайааччыларыгар махтанабыт. 1,2,3 миэстэни ылбыт кыттааччылар добун суругунан уонна сэмэй бэлэҕинэн наҕарааданаллар. Анал ааттары, туоһу, добун суруктары Е.А.Борисов аатынан киин бибилэтиэкэттэн кэлэн ыларгытыгар. Сахалыы саҥа сатараатын, сайда, чэчирии турдун!
