«Ийэ сүрэҕэ, кыһамньыта уонна өйөбүлэ»
Алтынньы 17 күнүгэр Е.А.Борисов аатынан киин бибилэтиэкэҕэ ийэ күнүгэр аналлаах Чурапчы улууһун «Матери России» хамсааһын тэрийиитинэн «Ийэ сүрэҕэ, кыһамньыта уонна өйөбүлэ» тэрээһин ыытылынна. Кэлбит ийэлэргэ анаан 4 былаһаакка үлэлээтэ. Социальнай харалта специалистара тэрээһин кыттыылаахтарыгар, ийэлэргэ араас сүбэлэри: пособия, төлөбүр, льготалар тустарынан сиһилии кэпсээтилэр. Анал байыаннай дьайыы кыттыылааҕа «Якутия-Земля героев»кадровай программа курсаана А.П.Стручков ийэлэри кытта кэпсэттэ, бэйэтин сүбэлэрин биэрдэ, санаа атастастылар. «Радость» киин уһуйааччылара кэлбит ийэлэргэ гиипсэнэн уонна уруһуйга маастар кылаас көрдөрдүлэр. «Дьиэ кэргэн доруобуйата» диэн былаһааккаҕа дьахтар, оҕо доруобуйатыгар туһалаах кэпсэтии буолла. Билиҥҥи кэмҥэ дьиэ кэргэҥҥэ харчыны хайдах сөпкө туһанарга, дохуоду үрдэтиигэ сүбэлэри иһиттилэр. Бу күн тэрээһин кыттыылаахтарын Саха сирин «Матери России» хамсааһын бэрэссэдээтэлэ Прасковья Петровна уонна РФ сенатора Егор Афанасьевич Борисовтар эҕэрдэлээтилэр. Салҕыы тэрээһин түмүгэр үөрүүлээх быһыыга-майгыга оҕолорго анаммыт «Лики матери» куонкурус кыайыылаахтарыгар наҕараада туттардылар.
