КҮҮС ӨТТҮТТЭН КӨҺӨРҮЛЛҮҮ 82 сыла.

Балаҕан ыйын 19 күнэ- Чурапчы улууһугар кутурҕан күнэ. Аҕа дойду Улуу сэриитин кэмигэр 1942 сыллаахха Чурапчы оройуонун 41 колхуоһа партия Обкомун бюротун атырдьах ыйын 11 күнүнээҕи 213№-дээх уурааҕынан күүс өттүнэн Кэбээйи, Эдьигээн, Булуҥ оройуоннарыгар балык булдугар көһөрүллүүгэ барбыттара.

Ол чэрчитинэн Чурапчы улууһун гимназиятын үөрэнээччилэригэр өйдөбүнньүк уруоктар буолан аастылар.

Уруоктары анаан ыытта Улуустааҕы киин библиотека внестационарнай отделын библиотекарь үлэһитэ Вероника Егоровна Маркова.

Бу уруокка историяны сэгэтэн, күүс өттүттэн көһөрүллүү хайдах быһыылаахтык ааспытын, туох сыаллаах-соруктаах буолбутун, тоҕо Чурапчы улууһун көһөрбүттэрин оҕолор билистилэр.

Ол курдук  көһөрүүгэ биһиккэ сытар оҕолуун-уруулуун, тайах маска тэптэрэ сылдьар уонна лип сытар кыаммат кырдьаҕастыын барыта 5318 киһи  барбыта уонна айан саҕаланыаҕыттан 2000 -тан тахса киһи ыалдьан, хоргуйан өлөн, дойдуларыгар эргиллэр дьылҕаламматахтара.

Оҕолор ордук көһөрүллүү усулуобуйаны көрдөрөр Дмитрий Павлович Чечебутов тэрийбит Хатылы музейын хаартыскаларыттан туттубут малларын, маһынан оҥоһуллубут тэлиэгэлэри, олорбут мас дьиэлэрин, таҥастарын:саптарын интириэстээн көрдүлэр, ыйытык биэрдилэр. Ону таһынан көһөрүллүүгэ анаммыт кинигэлэртэн «Оонньооботох оҕо саас», «Чурапчы алдьархайа» кинигэлэри сэнээрэн көрдүлэр, суруллубут ахтыылары иһиттилэр.

Көһөрүү алдьархайын суорума суолун, охсуутун, бэйэлэрин харыстаммакка үлэлээбит, хорсуннарын уонна дьулуурдарын ыһыктыбатах дьоммутун кэриэстээн, өрүү умнубакка көлүөнэттэн көлүөнэҕэ история чахчытын тиэрдэр биһиги ытык сорукпут буолар. 

Төрөөбүт дойдубут, Чурапчыбыт барахсан, биһиги ханна да буолларбыт эйигиннин бииргэбит! Ааспыт ахтылыннын, урукку умнуллубатын!