«Хоһуун буойун — Иннокентий Барашков» кинигэ сүрэхтэниитэ буолла
Муус устар 9 күнүгэр Е.А.Борисов аатынан киин бибилэтиэкэҕэ биир дойдулаахпыт, Арыылаах нэһилиэгин бочуоттаах олохтооҕо, Гражданскай килбиэн бэлиэ хаһаайына, «Чурапчы» литературнай түмсүү чилиэнэ, хоһоонньут Анна Дмитриевна Барашкова – Айылҕаана суруйбут “Хорсунун иһин” уордьан кавалера, «Бойобуой сомоҕолоһууну бөҕөргөтүү иһин», “Байыаннай килбиэнин иһин” мэтээллэрдээх биир дойдулаахпыт хорсун аатын үйэтитэр Иннокентий Барашковка анаммыт «Хоһуун буойун” кинигэтин сүрэхтэниитэ буолла.
Кинигэ СӨ “Сахабэчээт” ГАТ Чурапчытааҕы «Саҥа олох» эрэдээксийэтигэр толору макета оҥоһуллан “Дани-Алмас” хампаанньа кыһатыгар 2026 сыллаахха, 50 экземплярынан, 142 страницалаах таҥыллан, бэчээттэнэн тахсыбыт.
Чурапчы улууһун Арыылаах нэһилиэгиттэн төрүттээх элбэх оҕолоох дьиэ кэргэн амарах аҕата Барашков Иннокентий Иванович олоҕун, 2022 сыл от ыйыгар Анал байыаннай эпэрээссийэҕэ көҥүл өттүнэн туруммутун, Ийэ дойдутун көмүскэлигэр сырдык тыына быстыбытын туһунан ийэтин, бииргэ төрөөбүттэрин, аймахтарын, иитээччитин, учууталларын, оскуолаҕа бииргэ үөрэммит оҕолорун, доҕотторун, бойобуой табаарыстарын, рота командирын ахтыылара түмүлүннүлэр. Ийэтэ Анна Дмитриевна Барашкова — Айылҕаана, олохтоох ааптар, “Чурапчы” литературнай түмсүү чилиэнэ Анал байыаннай эпэрээссийэҕэ аналлаах уонна уолугар анабыл хоһоонноро киирдилэр. Ааҕааччы киэҥ араҥатыгар ананар диэн кинигэ аннотациятыгар суруллубут.
Кинигэ сүрэхтэниитигэр «Биһигини умнаайаҕыт» диэн кинигэ быыстапката, ону тэҥэ Иннокентий Иванович тутта сылдьыбыт маллара-саллара, уордьаннара быыстапкаҕа турдулар. Тэрээһин саҕаланыытыгар ааптар Анал байыаннай дьайыыга уонна анабыл хоһооннорун И.М.Павлов аатынан Чурапчы орто оскуолатын «Память» байыаннай-патриотическай кулуубун, поисковай Карбышевскай Бүтүн Арассыыйатааҕы юнармия иитиллээччилэрэ ааҕан иһитиннэрдилэр.
Бу тэрээһиҥҥэ Иннокентий Барашков кэргэнэ Сахалена Валериевна Барашкова, оҕолоро, бииргэ төрөөбүт эдьиийэ, учуутала, бииргэ үөрэммит оҕолоро, чугас доҕотторо кэлэннэр истиҥник ахтан-санаан оҕо, оскуола, эдэр саастарын хайдахтаан курдук кини үтүө сүрэхтээҕин, чугас дьонугар кыһамньылааҕын, холку майгылааҕын кэлбит дьоҥҥо билиһиннэрдилэр.
Саха Республикатын ыччат дьыалаларыгар уонна социальнай коммуникацияҕа министрэ П.В.Шамаев, Чурапчы улууһун баһылыга С.А.Саргыдаев, Чурапчы нэһилиэгэ тыа сирин түөлбэтин сүрүннүүр исписэлииһэ М.П.Матвеева, Арыылаах нэиһилиэгин тыа сирин түөлбэтин баһылыга А.А. Янцен, Чурапчы улууһа бойобуой дьайыы бэтэрээннэрин түмсүүтэ, салайааччы С.А.Жендринскэй, киин бибилэтиэкэ «Е.А.Борисов центрын» сэбиэдиссэйэ В.А.Платонова Ийэ дойдутун туһугар олоҕун толук уурбут хоһуун буойун Иннокентий Барашков курдук чулуу уолаттарбыт эдэр ыччакка үтүө холобур буолуохтара диэн, ону тэҥэ кинилэр ааттарын үйэтитии олус наадалааҕын бэлиэтээтилэр. Кинигэ ааптарыгар, кинигэ тахсыытыгар көмөлөспүт дьоҥҥо, кыттыыны ылбыт чугас дьонноругар махталларын тиэртилэр.
Кинигэ сүрэхтэниитин иилээн ыытта кииннэммит библиотечнай ситим библиограба М.Н.Кузьмина.
