Муус устар 7 күнүгэр «Дэриэбинэ дьылҕата — норуот дьылҕата» өрөспүүбүлүкэтээҕи бырайыак ааптара СӨ үөрэҕириитин туйгуна,СӨ суруйааччыларын сойууһун чилиэнэ, хоһоонньут, кэпсээнньит Гавриил Иннокентьевич Адамов — Сайдамныын көрсүһүү «Айылгы» НАДь аактабай саалатыгар буолла.
Гавриил Иннокентьевич оскуолаттан саҕалаан ыччакка төрөөбүт дойдуга тапталы иҥэриигэ, кинилэри аар  айылҕаларын харыстыыр өйгө — санааҕа туһаайыыга, бэйэ төрдүн, саха үгэһин билиҥҥи сайдыы ситимин кытта дьүөрэлии тутан үөрэтиигэ улахан болҕомтотун уурар. Кини 2008 сыллаахтан Үөрэҕи сайыннарыы уонна идэни үрдэтии институтугар үлэлиир кэмиттэн тыа сирин инники сайдыытыгар оскуолалар оруолларын үрдэтиигэ, аныгы кэм ырыынак сыһыанын саҥа хаһаайыттарын иитиигэ үлэлэһэр. Тыабыт сирэ сайдыытыгар туһуламмыт СӨ Ил Дархан Айсен Николаев  анал ыйааҕын олоххо киллэриини сөп түбэһиннэрэн, «Дэриэбинэ дьылҕата — норуот дьылҕата» биир кэлим бырайыагы толкуйдаан, ол аннынан аҕыс бырайыагы түмэн үлэлэтэн тэрийэр.
Көрсүһүүгэ кэлбит ыалдьыттар проект тула санааларын үллэһиннилэр.
Гавриил Инноконтьевичка айымньылаах үлэни, кэлэр кэнчээри ыччат кэскиллээх олоҕун туһугар үлэтэ хамнаһа тахсыылаах буоларыгар баҕа санааларын тиэртилэр.