Ахсынньы  10 күнүгэр   Е.А.Борисов аатынан улуустааҕы киин бибилэтиэкэҕэ  Кэбээйиттэн төрүттээх бэйиэт, драматург, кэпсээнньит, публицист, декламатор, педагог  Иннокентий Наумович Левин  — Ньээчис  “Эһиэхэ аныыбын  күн  уотун”    саҥа кинигэтин биһирэмин дьоро  тэрээһинэ ыытылынна. Кинигэ сүрэхтэниитигэр ыраах  Кэбээйи улууһуттан  биир дойдулаахтара,  10 тахса киһилээх  делегация   уонна саха народнай суруйааччыта биир дойдулаахпыт С.А.Попов-Сэмэн  Тумат  кэлэн  кыттыыны ыллылар. Саҥа кинигэ  быйыл 2024  сылга «Дани-Алмас» кинигэ кыһатыгар 200 экземплярынан, 326  сирэйинэн бэчээттэнэн Кэбээйи  улууһун  баһылыгын Левин Иван Иванович  үбүлээһининэн  тахсыбыт. Кинигэни  Иннокентий  Наумович бииргэ төрөөбүт  убайын оҕото, сиэн балта   Петрова  Альбина Васильевна   суруйааччы   архивыттан   рукопистарын   хомуйан, айымньыларын  таҥан  « айбыт –туппут  олоҕун, айымньыларын   дьон-сэргэ билиэхтээх”  диэн  үтүө санаанан салайтаран  күн сирин көрдөрбүт. Кинигэ “Оҕолорго`  уонна «Хоһооннор”  диэн икки улахан түһүмэхтэн  турар.  Оҕолорго анаммыт  түһүмэххэ  төрөөбүт  тылы, айылҕаны  таптыырга  үөрэтэр-иитэр хоһооннор, остуоруйалар, пьеса, музыкальнай оонньуулар киирбиттэр. Иккис түһүмэххэ  түөрт салааланан  таҥыллан  төрөөбүт дойду, олох, таптал, айылҕа кэрэтэ уонна анабыл хоһооннор киирбиттэр. Тэрээһин саҕаланыытыгар “Улыбка” уһуйаан кырачаан иитиллээччилэрэ Иннокентий Левин оҕолорго анаабыт хоһооннорун чоргуччу  ааҕан иһиттиннэрдилэр.   Биһирэми  икки улуус бибилэтиэкэрдэрэ Чурапчытааҕы киин бибилэтиэкэ ааҕааччыны кытта үлэлиир отдел сэбиэдиссэйэ Кузьмина Марфа Николаевна уонна Кэбээйи улууһун Мукучу модельнай бибилэтиэкэ  бибилэтиэкэрэ  Им Ия Николаевна  ыыттылар. Суруйааччы олоҕун, айар үлэтин, саҥа кинигэни киэҥник ырытан билиһиннэрдилэр.  Иннокентий Левин  1971 сыллаахха Саха Судаарыстыбаннай университетын саха салаатын  бүтэрэн Абый, Чурапчы улууһун Алаҕар нэһилиэгэр  саха тылын уонна литературатын учууталынан  өр  сылларга үлэлээбит. Айар  үлэҕэ 70 -с сыллартан саҕалаан лириик поэт быһыытынан  биллэн -көстөн барбыта.  «Саҥа олох» хаһыакка бастакы хоһоонноро бэчээттэммиттэрэ. «Сааскы үөрүү» хоһооннорун хомуурунньуга 1972 с., «Айдаар үс түүлэ» кэпсээннэрэ 1990с., «Баайык» кэпсээннэрэ 1994 с., суруйааччы олоҕун, айар үлэтин  сырдатар “Эйэ баар буолан”, “Иннокентий  Наумович  Левин — Ньээчис”  дьоһун  кинигэлэрэ  2023 с. бэчээттэнэн тахсыбыттара. Дьоро күҥҥэ  икки улуус дьоно -сэргэтэ  кыттан, талааннаах поэт, суруйааччы туһунан бииргэ үлээбит, алтыспыт   дьоно-сэргэтэ, уруу-хаан аймахтара  ахтан санаан аастылар. Кэбээйи улууһун  баһылыгын  эбээһинэһин солбуйааччы   Сивцев А.С., улуустааҕы библиотечнай ситим  директора Спиридонова А.Д, Кэбээйи нэһилиэгиттэн  бибилэтиэкэр  Оконешникова С.В., кыраайы үөрэтээччи Павлов Е.А., Чурапчы  улууһун  баһылыгы социальнай  боппуруоска солбуйааччы Кронникова М.Ф., Чурапчы улууһун култууратын управлениятын  салайааччытын солбуйааччыта  Смирников М.В. Чурапчытааҕы кииннэммит библиотечнай ситим директора  Смирникова А.М .  тыл этэн,  эҕэрдэ  суруктары туттардылар. Суруйааччы Иннокентий Наумович  Левин   төрөппүт  кыргыттара   Кэбээйиттэн Полина Иннокентьевна  Адамова, Чурапчы  олохтооҕо Туйаара Иннокентьевна Левина, аймаҕа Гаврил Прокопьевич  Левин   сырдатан кэпсээтилэр. Саха норуодунай суруйааччыта, биир дойдулаахпыт Семен Андреевич Попов – Сэмэн Тумат  доҕорун туһунан истиҥник   ахтан –санаан ааста.  Семен Андреевич  “ уруу-хаан аймах киһи  өйдөөн,өйөөн  суруйааччы  үтүөтүн-өҥөтүн таһаарара  олус  хайҕаллаах”   диэн этэн  туран  Албьина  Васильевнаҕа  махтал тылларын  эттэ. Кэбээйиттэн саха норуодунай артыыһа ырыа кэһиилээх   Алексей  Калининскай –Луҥха  Өлөксөй   баяҥҥа доҕуһуоллаан ыллаабыта   тэрээһини  тупсаран- ситэрэн хоторон  биэрдэ,  ыалдьыттар  олус  дуоһуйа  сэҥээрэ иһиттилэр.  Тэрээһин түмүгэр Кэбээйи уонна Чурапчы библиотечнай ситимнэрэ  бииргэ үлэлииргэ сөбүлэҥ түһэристилэр. Ыраахтан кэлбит ыалдьыттарбытыгар, делегация  кыттыылаахтарыгар, аймахтарыгар  тэрээһиҥҥэ кэлэн кыттыыны  ылан, олус истиҥ, сэргэх  тэрээһин  ыытыытыгар күүс-көмө  буолбуттарыгар  улуустааҕы бибилэтиэкэ  салалтатын  уонна  коллективын аатыттан истиҥ махталбытын тиэрдэбит!