Егорова Светлана Георгиевна – Тулуйхаана

Егорова (Габышева) Светлана Георгиевна Чурапчы оройуонун Хоптоҕо нэһилиэгэр 1953 сыллаахха ахсынньы 12 күнүгэр  төрөөбүтэ. 1981 сыллаахха СГУ нуучча тылын салаатын  бүтэрэн баран  Исидор Барахов аатынан орто оскуолаҕа учууталынан, директоры солбуйааччынан  өр сылларга таһаарылаахтык үлэлээбитэ. Өрөспүүбүлүкэтээҕи учууталлар идэлэрин үрдэтэр институтка методиһынан үлэлээбитэ. Бастакы хоһооннорун «Чэчир» диэн олохтоох автордар литературнай түмсүүлэригэр дьарыктанар кэмнэригэр суруйбута. Кини айар үлэтигэр Николай Якутскайы, Петр Тобуруокабы, Семен Руфовы, Василий Сивцевы, Христофор Гороховы кытта көрсүһүүлэрэ, Уйбаан Ороһуунускайы, П. Одорууһабы, М. Матаахабаны кытта алтыһыылара төһүү күүс буолбуттара. Светлана Георгиевна бастакы  «Түннүкпэр сибэкки ардаҕа» диэн хоһооннорун хомуурунньуга 2004 сыллаахха күн сирин көрбүтэ. “Үрүҥ күн үтүөтүн тарҕатан”  диэн кинигэтин  ийэтигэр Габышева Анисия Гаврильевнаҕа анаабыта. “Сырдык сулус суола сүппэт”   ахтыыларын  кинигэтэ 2013 сыллаахха тахсыбыта. “Тохтобул — рубаилар”   кинигэтэ  2017 сыллаахха күн сирин көрбүтэ.   Светлана Георгивна 20-тэн тахса хоһооно ырыа буолан ылланаллар.

Айымньылара

Түннүкпэр сибэкки ардаҕа : хоһооннор / Светлана Егорова ; [худ. К. С. Саввин]. – Дьокуускай : ООО РИЦ «Офсет», 2004. – 48 с.

Үрүҥ күн үтүөтүн тарҕатан : ийэм уонна кини  үөрэнээччилэрэ. – Дьокуускай : Дани-Алмас,2012.-48 с.

Киһи суола сүппэт : ахтыылар . – Дьокуускай : Копиртехсервис, 2013. – 68 с.

Этикет современного школьника / Улус. Упр. Образ. Верхневилюйского улуса РС (Я) ; [сост: С.Г.Егорова]. – Якутск : Дани-Алмас, 2014. – 143 с.

Висса уонна Виссарион : кэпсээн / Е. Г. Егорова // Эдэр коммунист. – 1985. – Атырдьах ыйын 16 к.

Олох уларыйыыта ; Сүрүөн! : хоһооннор / С. Г. Егорова // Кэскил. – 1993. – Балаҕан ыйын 21 к

Сиэркилэ иннигэр эргийдим ; Оҕо курдук оонньуохпун ; Хаҕыс, курус киэһэҕэ : хоһооннор / Е. Г. Егорова // Сахаада. – 1994. – Балаҕан ыйын 1 к.

Суһуох : хоһоон / Светлана Егорова // Саҥа олох. – 1996. – От ыйын 2 к. – С. 3.

Хоһоонноох хонуубар : хоһоон / Светлана Егорова // Чолбон. – 2003. – № 8. – С. 36-39.

Рубаилар // Чолбон. – 2016.- №3.

Сардаананы кыһын да тилиннэриэм этэ мин

Үрүҥ күн уотугар сууланан

Эн миэхэ бу тиийэн кэллэргин,

Чап-чараас уостаргын сэгэтэн

Кыым саҕар тыллары эттэргин.

Сардаананы кыһын да

Тилиннэриэм этэ мин.

Нап-нарын ый кыыстаах киэһэҕэ

Эн миигин кытары хаамтаргын,

Тырымнас ол чолбон сулуһу

Эйиэхэ биэрэбин күүттэргин.

Сардаананы кыһын да

Тилиннэриэм этэ мин.