Алтынньы 28 күнүгэр улуустааҕы киин библиотекаҕа Комсомол тэриллибитэ 105 сылыгар анаммыт «Эдэр сааьым аргыһа — Комсомол» тематическай биэчэр буолан ааста.Тэрээһиҥҥэ улуустааҕы коммунистическай партия чилиэннэрэ, комсомол кэмигэр үлэлээбит аҕам саастаах дьон кыттыыны ыллыллар. Үөрүүлээх чааһыгар комсомол ветераннарын Чурапчытааҕы компартия бастакы сэкиритээрэ Никитин Семен Иванович эҕэрдэлээн махтал суруктары туттарда.

Улуустааҕы бэтэрээннэр сэбиэттэрин бэрэссэдээтэлэ Матвеева Мотрена Николаевна Комсомол күнүнэн кэлбит ыалдьыттары эҕэрдэлээтэ, Чурапчы нэһилиэгин олохтоохторугар Попов Василий Васильевичка уонна Сивцев Анатолий Алексеевичка үбүлүөйдээх 75 саастарынан эҕэрдэ сурук, бэлэх туттарда.

Библиотекарь Захарова Мотрена Николаевна тэрээһин кыттыылаахтарыгар комсомол историятын кэрэһэлиир хаартыска, кинигэ быыстапкатын сырдатан билиһиннэрдэ.

Кэлбит ыалдьыттар Комсомол саҕанааҕы сыллары, эдэр саастарын, доҕотторун ахтан — санаан ирэ — хоро кэпсэтэн, оччотооҕу ыччаты үлэҕэ, үөрэххэ кынаттаабыт ырыалары ыллаатылар, хоһоон аахтылар. Комсомол бойобуой суолларын историятыттан өй күрэҕэ бэт сытыы, чаҕылхай буолла.

«Умнуллубат киинэлэр» оонньууга дьоҥҥо-норуокка сөбүлэппит сэбиэскэй киинэлэри таайан сэргэхсийдилэр. Албан ааттаах Комсомол эдэр ыччаты биир сомоҕо гынан түмэн дойдубут сайдыытыгар киллэрбит кылаата сүҥкэн улахан. Комсомолга оччотооҕу эдэр ыччат ийэ дойдуну таптыырга, улэҕэ бэриниилээх буолууга, ыарахантан чаҕыйбат, куруутун үлэҕэ, үөрэххэ инники күөҥҥэ сылдьарга иитиллибиттэрэ. Комсомол кэккэтигэр киирэн буһан — хатан, иитиллибит улуус, республика сайдыытыгар дьоһун кылааттарын киллэрбит чулуу биир дойдулаахтарбыт күн бүгүн эдэр ыччакка үтүө холобур буолаллар.

Ыччаты кэскилгэ угуйар
Сулус этэ Комсомол.
Эдэри үлэҕэ күүрдэр
Сыаллаах этэ Комсомол.Эҕэрдэ эьиэхэ эдэр сааьым
Эрэллээх аргыстара!
Улуу Ленин комсомолун
Уруйдаах улуу күнүнэн!