Е.А.Борисов аатынан киин бибилэтиэкэтин нэдиэлэтээҕи сонуннара
Олунньу 9 күнүгэр С.К.Макаров аатынан Чурапчы гимназиятын 5, 6 уонна 10 кылаастарын үөрэнээччилэрэ бибилэтиэкэҕэ экскурциялаатылар.
Олунньу 10 күнүгэр Чурапчыга Федерация сэбиэтин кэмитиэтин бэрэссэдээтэлин солбуйааччыта Егор Афанасьевич Борисовы кытары тыа хаһаайыстыбатын сайдыытыгар туһуламмыт мунньах кыттыылаахтара Москваттан, Дьокуускайтан, өрөспүүбүлүкэ араас улуустарыттан ыалдьыттар, интэриэстээх дьон, аграрнай хайысхалаах үөрэх кыһаларын үлэһиттэрэ киин бибилэтиэкэҕэ ыалдьыттаан аастылар. Е.А.Борисов архыып-бибилэтиэктин, фондатын кытта билистилэр.
Төрөөбүт тылбыт күнүн чэрчитинэн нэдиэлэ устата Чурапчы улууһун орто оскуолаларыгар, үөрэх кыһаларыгар «Төрөөбүт тыл» туһунан уруоктар ыытылыннылар. Ол курдук олунньу 11 күнүгэр Чурапчытааҕы судаарыстыбаннай физкультура уонна спорт институтун устудьуоннарыгар Тыл күнүн чэрчитинэн С.А.Новгородов олоҕун, айар үлэтин туһунан сылабаарынан сирдьиттээх ТОК өй күрэһэ буолла. Оҕолор сүрдээх актыыбынайдарын көрдөрөн бэрт сэргэх тэрээһин ааста. Оонньууну ааҕааччыны кытта үлэлиир салаа бибилэтиэкэрэ В.Е.Маркова ыытта.
Бу күн С.А.Новгородов аатынан Чурапчы орто оскуолатын 9,10”б”, 11”а”, 11”в” кылаастарын, ону тэҥэ С.К.Макаров аатынан Чурапчытааҕы гимназия 10″а»,»б»,11″а» кылаастарын үөрэнээччилэригэр Сахалыы лингвистическай сылабаардарынан уруок уонна тыл оонньуута ыытылыннылар. Уруоктары ыыттылар ааҕааччыны кытта үлэлиир салаа бибилэтиэкэрдэрэ В.П.Лонгинова, Л.Т.Никитина, В.Е.Маркова.
Ааҕааччыны кытта үлэлиир салаа сэбиэдиссэйэ Е.Н.Дьячковская И.М.Павлов аатынан Чурапчы орто оскуолатын үөрэнээччилэригэр «Төрөөбүт тылым барҕа баайым» диэн уруоктары уонна тыл оонньуутун ыытта.
Олунньу 12 күнүгэр “Айылгы” норуот айымньытын дьиэтигэр «Развитие сельских территорий — будущее страны» Бүтүн Арассыыйатааҕы научнай-практическай конференция буолла. Арассыыйа куораттарыттан, өрөспүүбүлүкэ араас муннуктарыттан элбэх кытааччы кэлбит. Чурапчытааҕы кииннэммит библиотечнай ситим үлэһиттэрэ В.Е.Маркова, А.В.Аммосова, С.Е.Протодьяконова «Культурный код» былаһааккаҕа кыттыыны ыллылар.
Бу күн научнай-практическай конференция кыттааччылара Мэҥэ-Хаҥалас улууһун Аллараа-Бэстээх оскуолатыттан делегация Е.А.Борисов архыып-бибилэтиэкэтигэр ыалдьыттаатылар.
Киин бибилэтиэкэ саалатыгар улуустааҕы уруһуй күрэҕэ “Уран тыл уустарын мэтириэтэ” быыстапката турда. Манна Чурапчы улууһун нэһилиэктэрин оскуолаларыттан оҕолор уруһуйдара турдулар.
Буолаары турар «Айхаллан Чурапчы» фестивальга бэлэмнэнии бара турар. Ол курдук фестиваль кыттыылаахтара бибилэтиэкэни кытта үлэлэһэн атын омук хоһооннорун сахалыы тылбаастарын көрдөөн, ааҕан, наадалаахтарын булаллар.
Оҕо төрөөбүт тылынан ааҕарын көҕүлүүр «Төрөөбүт тыл биһигэ» киин, Оҕо библиотекатын иһинэн тэриллэн, «Бастыҥ бэлэх — кинигэ» акция биллэриллибитэ. Акциябыт салҕанан бара турар.
Нэдиэлэни түмүктүүр тэрээһиммит олунньу 13 күнүгэр — Төрөөбүт тылбыт күнүгэр «Сахалыы дьыктаан 2026» буолла. Уопсайа 12 киһи бэйэлэрин холонон көрдүлэр. Дьыктааммыт Д.К.Сивцев — Суорун Омоллоон «Чүөчээски» диэн айымньытыттан быһа тардыыны суруйдулар. Түмүк: «Бастыҥтан бастыҥ суруксут» буолла — Борисова Анна Юрьевна, «Бастыҥ суруксут» — Аммосова Надежда Николаевна, «Үчүгэй суруксут» — Дьячковская Екатерина Александровна буоллулар. Дьүүллүүр сүбэ бэрэссэдээтэлинэн С.А.Новгородов аатынан Чурапчы орто оскуолатын дьиэҕэ олорон үөрэнэр оҕолору үөрэтэр саха тылын учуутала Феоктистова Е.Ф, ону тэҥэ киин бибилэтиэкэ ааҕааччыны кытта үлэлиир салаа бибилэтиэкэрэ В.П.Лонгинова, цифровой технология сэбиэдиссэйэ С.К.Флегонтова үлэлээтилэр.
Маны таһынан С.К.Макаров аатынан 10, 11 кылаас үөрэнээччилэригэр «Сахалыы дьыктаан 2026» эмиэ ыытылынна. Уопсайа 24 оҕо кытынна. Дьыктаанын түмүгэ: «Бастыҥтан бастыҥ суруксут» — Новгородова Виолетта 10″а» кылаас, «Бастыҥ суруксут» — Сивцева Аэлина 11 «б», «Үчүгэй суруксут» — Сивцева Айсаана 11 «б», «Үчүгэй суруксут» — Слепцова Ангелина 10 «а» кылаас.
