Е.А.Борисов аатынан киин бибилэтиэкэкэҕэ «Төрүт дойдум Уорҕа» диэн кинигэ биһирэбилэ буолла
От ыйын 4 күнүгэр Е.А.Борисов аатынан киин бибилэтиэкэҕэ «Төрүт дойдубут Уорҕа» диэн кинигэ сүрэхтэниитэ буолла. Кинигэ Дьокуускай куоракка «Көмүөл» кинигэ кыһатыгар 2025 сыллаахха, 496 страницалаах 60/90 1/8 форматтаах, 400 экземплярынан бэчээттэнэн тахсыбыт. Бу кинигэни П.Н.Сокольников аатынан Чурапчы оройуонун киин балыыһатын клиника-диагностическай лабораториятын сэбиэдиссэйэ, Саха Өрөспүүбүлүкэтин, Российскай Федерация доруобуйатын харыстабылын туйгуннара, Гражданскай килбиэн хаһаайына Любовь Михайловна Григорьева хомуйан оҥорбут. Кинини кытта бииргэ үлэлэспит архыып матарыйаалларын хасыһан оҥорууга, дьон ахтыыларын хомуйууга, аймахтарынан араартааһыҥҥа, хаартыскаларын хомуйууга, дьон аатын чуолкайдааһыҥҥа, эрэдээксийэлээһиҥҥэ үлэлээбит хамыыһыйа чилиэттэриэнэн буолаллар Марфа Валериевна Андросова, Ирина Константиновна Васильева, Марфа Николаевна Дьячковская уонна Наталья Дмитрьевна Лукина. Кинигэҕэ уорҕа учаастагын үһүйээннэрин, номохторун, былыргытын, Аҕа дойду сэриитин, сут-кураан аһыытын, сэбиэскэй кэминээҕи олоҕун-дьаһаҕын, уруккута бас-көс салайааччылардаах, үрүҥ илгэни үрүлүппүт чулуу ыанньыксыттардаах, герой-пионердаах, уран уустардаах, инники күөҥҥэ сылдьан үлэни-хамнаһы күүскэ тэниппит, илиилэрин үлэттэн араарбатах туруу үлэһит дьоннордоох, ыччат дьон тоҕуоруһа мустан олорор, кэлин олох сайдыытынан Уорҕа уларыйыыта сырдатыллыбыт.Бу тэрээһиҥҥэ «Сырдатааччы, айааччы, үйэтитээччи» Л.М.Григорьева хомуйан оҥорбут кинигэлэрин быыстапката турда. Кинигэ сүрэхтэниитигэр ыалдьыт буолан кэлэннэр Чурапчы улууһун баһылыгын солбуйааччы А.Г.Лобанов, Чурапчытааҕы судаарыстыбаннай физическэй култуура уонна спорт иниститутун дириэктэрэ И.И.Готовцев, Чурапчы улууһун «Хадаар нэһилиэгэ” тыа сирин түөлбэтин баһылыга А.А.Степанов, Саха норуодунай суруйааччыта, Амма улууһун бочуоттаах олохтооҕо Д.Ф.Наумов, Л.М.Григорьева бииргэ үлэлээбит коллегалара Саха Өрөспүүбүлүкэтин үтүөлээх бырааһа А.И.Коркин уонна А.И.Федоров, Россия суруйааччыларын сойууһун чилиэнэ, Чурапчы улууһун бойобуой дьайыы бэтэрээннэрин сэбиэтин бэрэссэдээтэлэ, улуустааҕы «Саҥа олох» хаһыат үрдүк кэрэспэдьиэнэ С.А.Жендринскэй, аймах-билэ дьонноро, уорҕаттан төрүттээх биир дойдулаахтара бэйэлэрин ахтыыларын оҥордулар, үтүө санааларын, эҕэрдэлэрин, истиҥ тылларын тириэртилэр.Истиҥ биэчэри иилээн-саҕалаан ыытта, кинигэни ырытта ааҕааччыны кытта үлэлиир отдел сэбиэдиссэйэ М.Н.Кузьмина.
