Бэс ыйын 10 күнүгэр Е.А.Борисов аатынан киин бибилэтиэкэҕэ самаан сайын кэлбитинэн, ыһыахтар кэмнэрэ саҕаламмытынан  «Ыһыах маанылаах иһитэ» диэн сахалыы чорооннор быыстапкалара аһылынна. Бүгүҥҥү сэдэх быыстапка толору РФ сенаторын Е.А.Борисов  тус коллекциятыттан турар, киниэхэ араас сылларга салайар үлэҕэ сылдьыбыт  кэмнэригэр бэлэх уунуллубут чорооннор буолаллар. Чороон сахаларга уйгуну-быйаҥы кытта быстыспат сибээстээх, онон ыһыах маанылаах иһитэ буолар. Чинчийээччилэр бэлиэтииллэринэн чороон араас көрүҥэ элбэх. Бу быыстапкаҕа эмиэ ол курдук араас улуустар маастардара уустаан-чочуйан, ойуулаан-мандардаан оҥорбут сиэдэрэй чорооннорун арааһын көрүөххэ сөп. Манна мастан, фарфортан, курустаалтан, алтантан, чугуунтан оҥоһуллубут ураты, кэрэ чорооннор бааллар. Ону тэҥэ бу быыстапкаҕа Сунтаар улууһун маастардара үрүҥ көмүстэн оҥорбут, айбыт-туппут сахалыы ат толору симэҕэ көрдөрүлүннэ. Быыстапка бэс ыйын 22 күнүгэр диэри үлэлиир. Кэлиҥ, көрүҥ, сэргээҥ!