Бүгүн, бэс ыйын 4 күнүгэр Е.А.Борисов аатынан киин бибилэтиэкэҕэ киэн туттар биир дойдулаахпыт, саха норуодунай суруйааччыта, П.А.Ойуунускай аатынан  Судаарыстыбаннай  бириэмийэ лауреата, Саха Өрөспүүбүлүкэтин Духуобунас академиятын академига, Доҕордоһуу уордьан кавалера Василий Семенович Яковлев — Далан төрөппүт кыргыттара Ольга Васильевна Анисимова уонна Лолита Васильевна Яковлева, ону кытта суруйааччы аймахтара ыалдьыттаатылар. Күндү ыалдьыттарбыт бибилэтиэкэҕэ экскурсиялаатылар, Е.А.Борисов архыып-бибилэтиэкэтин билистилэр.      

А.П.Гоголев аатынан оҕо ускуустубатын иһинэн үлэлиир «Театральнай кылаас” лааҕырын оҕолоро бибилэтиэкэни кытта билсэн экскурсиялаатылар. Салайааччы Алексей Ходулов.

Бэс ыйын 6 күнүгэр киин бибилэтиэкэ былассааккатыгар «Сибэкки ыһыаҕа» диэн оҕуруот аһын, сибэккилэрин атыы-тутуу дьаарбаҥката буолла. Ол курдук уопсайа 12 бэйэ дьыалатынан дьарыктанар, оҕуруот аһын, сибэккини сөбүлээн  үүннэрэр дьон кэлэн үүнээйилэрин, арассаадаларын атыылаатылар. Бу күн «Дизайн вашего сада» диэн оҕуруоччуттарга аналлаах сүбэ кинигэлэр быыстапката турда, тупсаҕай көстүүлээх фотозона үлэлээтэ. Кэлбит ыалдьыттарга «Сибэкки — олохпут киэргэлэ» хоһоон күрэҕэ ыытыллан  8 кыттааччы кыттыыны ылла, уонна маннык түмүк таҕыста: 1 миэстэ — Попова Степанида Ивановна, 2 миэстэ — Абрамова Галина Николаевна, 3 миэстэ — Екечьямова Кыыдаана Михайловна. Кыайыылаахтарга диплом уонна бириис туттарылынна. Валентина Петровна Карсанаева оҕуруоччуттарга үүнээйини хайдах көрөргө-истэргэ бэйэтин сүбэтин кэпсээтэ. Дьон-сэргэ тоҕуоруһа мустан үөрэн-көтөн, арассаада арааһын атыылаһан астынан тарҕастылар. Маннык тэрээһиннэргэ инникитин да кыттыыны ылар буолаарын диэн ыҥырабыт.