Е.А.Борисов аатынан киин бибилэтиэкэҕэ нэдиэлэ устата ыытыллыбыт тэрээһиннэри сырдатабыт

Кулун тутар 17 күнүгэр киин бибилэтиэкэ ааҕар саалатыгар Улуу Кудаҥса аатын үйэтитиигэ Чурапчы улууһун кыраайы үөрэтээччилэрэ мустан мунньахтаатылар. Улуу Кудаҥсаҕа анаан пааматынньык туруорарга быһаарыстылар.

Кулун тутар 18 күнүгэр С.А.Новгородов аатынан Чурапчы орто оскуолатын үөрэнээччитэ Екечьямова Арина ийэтинээн Кыыдаана Михайловналыын (салайааччы Саргылаана Седалищева) Сэмэн Ноҕуруодап алпабыытын киэҥ араҥаҕа тарҕатар «Ноҕуруодаптыы тыын» бырайыактарын кэлэн көрдөрдүлэр. Е.А.Борисов аатынан киин бибилэтиэкэ бу бырайыагы өйүүрүн туһунан сурук түһэристилэр. Арина бибилэтиэкэҕэ Ноҕуруодап алпабыытынан суруллубут араамалаах бэргэн этиилэри бэлэх уунна.

«Умсулҕан» куруһуок салҕанар. Хатайдааһын ньыматынан сахалыы олбох оҥороллор. Салайааччы ааҕааччыны кытта үлэлиир салаа бибилэтиэкэрэ М.Н.Захарова

Кулун тутар 19 күнүгэр үгэскэ кубулуйбут, сылын аайы ыытыллар  «Пока горит свеча” улуустааҕы оскуола оҕолоругар анаан хоһоон ааҕыытын күрэҕэ буолла.

Кулун тутар 20 күнүгэр «Бойобуой доҕордоһуу чаҕылхай туоһулара» кинигэ сүрэхтэниитэ буолла. Эдуард Еремеев диэн Сунтаар олохтооҕо суруйбут икки бойобуой доҕордуулар тустарынан суруйбут кинигэтэ буолар.

Үөрүүлээх сонун. Бүгүн Дьокуускай куоракка  бырабыытылыстыба дьиэтигэр СӨ култуураҕа уонна духуобунай сайдыыга миниистирэ Афанасий Ноев Чурапчытааҕы кииннэммит библиотечнай ситими өр сылларга салайбыт  Платонова Вера Аполлоновнаҕа  «Саха Өрөспүүбүлүкэтин култууратын Бочуоттаах үлэһитэ» үрдүк ааты   туттарда. Чурапчытааҕы библиотечнай ситим бары  үлэһиттэрин ааттарыттан ытыктыыр, убаастыыр салайааччыбытын Вера Аполлоновнаны  өр сыллаах үтүө суобастаах, таһаарыылаах үлэн сыаналаммытынан,  үрдүк  наҕарааданан итиитик-истиҥник эҕэрдэлиибит!