Ыам ыйын 14-21 күннэригэр Е.А.Борисов аатынан киин бибилэтиэкэ тэрийиитинэн ыытыллыбыт «Улуу Кыайыыны уруйдуубун» диэн Өрөспүүбүлүкэтээҕи кэтэхтэн хоһоон ааҕыы күрэҕэ ыытылынна. Күрэххэ барыта 18 кыттааччы, ол иһигэр ыаллыы сытар улуустартан кытыннылар. Таатта улууһун Ытык-Күөл нэһилиэгиттэн А.Е.Мординов аатынан лициэйин учууталларын “Умсулҕан” уус-уран бөлөҕө, Таатта улууһун Игидэй нэһилиэгин «Иэйии» уус-уран түмсүүтэ, Чурапчы улууһун Мугудай нэһилиэгин «Күбэйэ» уус-уран түмсүүлэрэ бөлөҕүнэн кытыннылар уонна биирдиилээн Мэҥэ Хаҥалас улууһун Майа сэлиэнньэтин М.И.Брызгалова аатынан оҕо бибилэтиэкэтиттэн, Чурапчы улууһун Одьулуун, Кытаанаах, Сылан, Мындаҕаайы, Мугудай, Чурапчы нэһилиэктэриттэн.Үс бастакы миэстэлээхтэр: Мугудай нэһилиэгиттэн “Күбэйэ” уус-уран түмсүү салайааччы Е.Д. Попова, Майатааҕы оҕо бибилэтиэкэтиттэн  Юнона Александровна Игнатьева, Одьулуун нэһилиэгиттэн Иван Ильич Попов. Иккис миэстэлэр: Таатта улууһуттан “Умсулҕан” уус-уран түмсүү,Чурапчы нэһилиэгиттэн Василий Трофимович Пермяков-Татыана уола, Сылан нэһилиэгиттэн Николай Павлович Трофимов. Үһүс миэстэлэр: Чурапчы нэһилиэгиттэн Сандаар Күн Сандаара Сулус кыыһа, Мындаҕаайы нэһилиэгиттэн Мария Николаевна Сергеева, Кытаанах нэһилиэгиттэн Надежда Дмитриевна Барашкова. Кыайыылаахтары истиҥник эҕэрдэлиибит!Ыам ыйын 21 күнүгэр И.М.Павлов аатынан Чурапчы орто оскуолатын 7”б”, 8”б”, 10 кылаастарын үөрэнээччилэригэр славянскай сурук-бичик күнүн чэрчитинэн «Появление письменности на Руси» диэн тиэмэлээх интерактивнай оонньуулаах уруок ыытылынна. Уруогу ыытта киин бибилэтиэкэ бибилэтиэкэрэ Л.Т.Никитина.    Ыам ыйын 22 күнүгэр үгэс буолбут «Сайылык күнэ» ыытылынна. Саха төрүт үгэһин тутуһан кинигэ быыстапката, иһитэ-хомуоһа, туттар мала-сала дьон көрүүтүгэр тупсаҕайдык оҥоһуллан турда. Кэлбит дьону сахалыы сиэринэн ыраастыыр туому ыытан, сахалыы астаах остуол тардан көрүстүлэр. Манна бэйэлэрин билиилэрин дьоҥҥо тарҕатар үтүө-мааны далбар хотуттарбыт Кондратьева К.П. үрүҥ ас эгэлгэтин, Бурнашева В.Г. ситии хатыытын, Ермолаева Л.А. бэйэ аһытыытынан астанар бурдук астар тустарынан көрдөрөн, быһааран кэпсээбиттэрин дьон сэҥээрдэ элбэх ыйытыыларга эппиэттээтилэр.Бу күн “Эмтээх оттор” түмсүү кыттыылаахтара ситии хатааһыныгар маастар кылааска сырыттылар. Элбэх сүбэ-ама, туһааннаах боппуруостарыгар эппиэт ыллылар.

Ыам ыйын 23 күнүгэр самаан сайын кэлбитинэн Чурапчы нэһилиэгэр киин болуоссакка Дьиэ кэргэн декадатын чэрчитинэн үгэскэ кубулуйбут “Сибэкки бырааһынньыга” ыытылынна. Бу дьон-сэргэ, олохтоохтор кэтэһэр, сөбүлүүр дьаһаллара Чурапчытааҕы киин бибилэтиэкэ көҕүлээһининэн 28-с төгүлүн ыытыллар. Күн бүгүн бу тэрээһин дьиэ кэргэн экэниэмикэтин бөҕөргөтүүгэ, күөх үүнээйини үүннэриигэ, көҕөрдүүгэ, сайыннарыыга төһүү күүс буолар.  Дьаарбаҥкаҕа оҕуруот аһын арааһа, сибэкки, талах мастар, көтөрдөр, атыы-тутуу киэҥ хабааннаахтык тэрилиннэ. Сибэкки бырааһынньыгар нэһилиэктэртэн биирдиилээн атыылааччылар, агро-оскуолалар, бааһынай хаһаайыстыбалар көхтөөхтүк кытыннылар. Киин бибилэтиэкэ ааҕааччыны кытта үлэлиир салаа исписэлииһэ В.Е.Маркова сааскы бастакы хомуллар эмтээх отторго бэйэтин сүбэтин кэпсээтэ.

Көһө сылдьар бибилэтиэкэ үлэтэ салҕанар. Ол курдук бу нэдиэлэҕэ  центральнай бухгалтерияҕа, налоговай тэрилтэтигэр, центральнай аптека үлэһиттэригэр, биирдиилээн дьиэҕэ олорор кырдьаҕастарга кинигэлэри уларыста. Көһө сылдьар бибилэтиэкэ өҥөтүнэн туһанын диэн ыҥырабыт.Бибилэтиэкэ саалаларыгар үрдүкү кылаас ЕГЭ,ОГЭ туттарар оҕолор күннэтэ кэлэн дьарыктаналлар, консультацияланаллар.