Ыам ыйын 12 күнүгэр киин бибилэтиэкэ саалатыгар илин эҥэр улуустарыгар «Общественнай десант” диэн тэрилтэлэргэ, актыбыыс ыччаттарга,  аналлаах семинар буолла.

Ыам ыйын 13 күнүгэр Чурапчытааҕы А.А.Саввин аатынан түмэл дьиэтигэр Чурапчы улууһун култууратын бэтэрээнэ, Хадаар нэһилиэгин бочуоттаах олохтооҕо, Чурапчы улууһун “Маарыкчаан” Республикатааҕы «Коллекционеры Якутии» түмсүү чилиэнэ, Саха Республикатыгар физкультурнай хамсааһын 100 сыла», «Саха сирин спордун бэтэрээнэ» бэлиэлэр хаһаайыннара Марфа Николаевна Дьячковская “Ааспыт, билиҥҥи, кэлэр кэми ситимниир туоһулар” диэн персональнай быыстапкатын арыллыыта буолла.

Ыам ыйын 15 күнүгэр Сылантан төрүттээх Чурапчы улууһун, Сылан нэһилиэгин бочуоттаах олохтооҕо, 20-с үйэҕэ Чурапчы бастакы үөрэхтээҕэ уонна комсомола, оҕо суруйааччыта Е.А.Макаров төрөөбүтэ 120 сыла. Кини оҕолору, дойдутун, айылҕатын олус таптыыра. Сиргэ-уокка сылдьан барытын болҕойон көрөн, үөрэтэн кэпсээннэригэр суруйара. Ол курдук С.А.Новгородов аатынан Чурапчы орто оскуолатын алын кылаас үөрэнээччилэрэ кини кэпсээннэрин дорҕоонноохтук ааҕан билистилэр.  Уруок бүтүүтэ оҕолор айылҕаны куруутун ыраастыы, хомуйа сылдьыах, кыһын чыычаахтары аһатыахпыт диэн бэлэмнэрин биллэрдилэр. Кэпсэтии уруогу ыытта киин бибилэтиэкэ бибилэтиэкэрэ М.Н.Захарова.

Биллэр судаарыстыбаннай уонна спортивнай диэйэтэл, 1993-1995 сылларга Саха Республикатын Бырабыыталыстыбатын Бэрэссэдээтэлин солбуйааччы, үп миниистирэ, Азия дуобакка федерациятын бастакы Президенэ Владимир Ильич Птицын үбүлүөйдээх 75 сааһынан быыстапка турда. Кини Саха сирин дуобакка федерацияларын салайбыт, отучча сыл устата дуобаты сайыннарыыга үлэлээбитин туһунан бэйэтэ суруйбут «Дуобатчыттардыын алтыспыт дьоллоохпун» диэн элбэх хаартыскалардаах, ахтыылардаах кинигэтин ылан уларсан ааҕыҥ диэн ыҥырабыт.

Ыам ыйын 15 күнүгэр Е.А.Борисов аатынан киин бибилэтиэкэҕэ Алаҕар нэһилиэгин «Алгыс» уһуйаан ветеран педагога, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин «Оскуола иннинээҕи үөрэхтээһин сайдыытыгар кылаатын иһин», «Бастыҥ методист», «Алаҕар нэһилиэгин сайдыытыгар кылаатын иһин» бэлиэлэр хаһаайкалара  өр сыллаах үлэтин үөрүйэхтэрин түмэн суруйбут «Обучение детей-саха русскому языку в национальных детских садах» программа автора, Попова Мария Петровна кинигэтэ саҥардыллан «Программа развития грамотной речи детей по русскому языку в национальных детских садах» диэн иккис тахсыытын үөрүүлээх тэрээһинэ буолла.

Ыам ыйын 16 күнүгэр Саха Республикатын народнай артыыската, Российскай Федерация культуратын үтүөлээх диэйэтэлэ, «Саха сирин идэлээх пианистарыттан биирдэстэрэ» диэн Саха сирин композитордарын Сойууһун чилиэнэ, историческай наука кандидата, эпосовед Аиза Петровна Решетникова төрөөбүтэ 80 сылыгар аналлаах литературнай-музыкальнай биэчэр ыытылынна. 

 А. П. Гоголев аатынан оҕо ускуустубатын оскуолатын фортепиано кылааһын преподавателэ Светлана Павловна Макарова биллиилээх муусука диэйэтэлэ  Аиза Петровна Решетникова олоҕун, айар үлэтин туһунан олус интириэһинэйдик киһи иһиттэр истиэх курдук арыйан билиһиннэрдэ. Киин библиотека үлэһитэ Ульяна Николаевна Атласова Аиза Петровналыын алтыспыт түгэннэрин истиҥник ахтан кэпсээтэ.Салҕыы биэчэргэ классическай музыка долгуна саала иһин толордо. Тэрээһин кыттыылаахтара ускуустуба оскуолатын үөрэнээччилэрэ, Светлана Павловна үөрэтэр оҕолоро фортепианоҕа, араас музыкальнай инструменнарга оонньуулларын видеороликка көрөн, истэн биһирээтилэр.

Бу күн Аан дойдутааҕы Табах утары күнүн чэрчитинэн Чурапчытааҕы аграрнай-техническэй колледж устудьуоннарыгар “Час здоровья: Дыши свободно, живи долго” диэн уруок ыытылынна. Киин бибилэтиэкэ исписэлииһэ В.Е.Маркова устудьуоннарга табахтааһын доруобуйаҕа  буортутун туһунан кэпсээтэ. Библиотека иһинэн үлэлиир «Умсулҕан» куруһуокка хатайдааһын ньыматынан маастар кылааска сахалыы олбох оҥордулар.