Бу нэдиэлэ устата Космонавтика күнүн  чэрчитинэн С.А.Новгородов аатынан Чурапчы орто оскуолатын 5 «б”, 7 “в”, 7 “г”, 9 “б”, 9 “г” кылаастарын үөрэнээччилэригэр “Что вы знаете о космосе” диэн викториналаах уруоктар ыытылыннылар. Уруоктары киин бибилэтиэкэ үлэһитэ А.П.Капрынова ыытта.    Муус устар 18 күнүгэр киин бибилэтиэкэ “Үүн-сайын” медиалабораториятыгар бибилэтиэкэ үлэһиттэригэр аныгы сыһыарыыларга  видеону монтажтыырга аһаҕас маастар кылаас буолла. Маастар кылааһы ыытта И.И.Поисеев.

Муус устар 15 күнүгэр В.С.Соловьев — Болот Боотур аатынан Хатылы орто оскуолатыгар “Баҕа, билии, билинии» диэн норуодунай суруйааччы Болот-Боотур төрөөбүтэ 110 уонна Улуу кыайыы 80 үбүлүөйдээх сылларыгар аналлаах өрөспүүбүлүкэтээҕи культурунай-образовательнай форум ыытылынна. Форуму салайан иилээн-саҕалаан ыытта киин бибилэтиэкэ Е.А.Борисов архыып-бибилэтиэкэтин отделын сэбиэдиссэйэ В.А.Платонова. Форумҥа буойун, суруйааччы, учуутал В.С.Соловьев Болот-Боотур олоҕун, айар үлэтин үйэтитиигэ ыытыллыбыт уонна инникитин тэриллиэхтээх үлэлэргэ туһаайан учуонайдар, суруйааччылар, учууталлар уонна хаан-уруу аймахтара киэҥ кэпсэтиини оҥордулар.

Билии-көрүү храма бибилэтиэкэ тупсаҕай уораҕайыгар быйыл начальнай кылааһы уонна оскуоланы бүтэрэр Чурапчы орто оскуолатын үөрэнээччилэрэ өйдөбүнньүк хаартыскаҕа түһүүлэрэ тэрээһиннээхтик ыытыллаллар. Бу нэдиэлэ устата манна кэлбит үөрэнээччилэргэ бибилэтиэкэ ис тутулун, үлэтин билиһиннэриигэ экскурсиялар эмиэ ыытылыннылар.