Е.А.Борисов аатынан киин бибилэтиэкэҕэ нэдиэлэ устата ыытыллыбыт тэрээһиннэри сырдатабыт

Ахсынньы 2 күнүгэр «Чолбон» сурунаал тэриллибитэ 100 сылыгар, А.Софронов төрөөбүтэ 140 сылыгар анаммыт «Чолбон өй күрэһэ» улуустааҕа түһүмэҕэ буолла. Уопсайа 10 хамаанда кыттыбытыттан кыайыылаах элбэх баалы хомуйан Чакыр нэһилиэгиттэн «Үргэл» хамаандата  салҕыы полуфиналга кыттарга путевка ылла.

Ахсынньы 2-3 күннэригэр Дьокуускай куоракка Саха сирин бибилэтиэкэрдэрин бастакы улахан сийиэстэрэ буолла. Саха сирин бары муннугуттан 234 дэлэгээт  кыттыыны ылла. Сийиэс сыала диэн бибилэтиэкэ дьыалатын сайдыытын, төрөөбүт тыллары харыстааһын, духуобунай-сиэрдээх сыаннастары бөҕөргөтүү буолар. 2 күннээх сийиэскэ элбэх кэпсэтиилэр, маастар кылаастар, инники үлэҕэ соруктар турдулар.

Ахсынньы 3 күнүгэр Чурапчытааҕы аграрнай-техническэй колледж устудьуоннарыгар «Биллибэт саллаат күнүн» чэрчитинэн Хорсун быһыы уруога ыытылынна. Е.А.Борисов аатынан киин бибилэтиэкэ бибилэтиэкэрэ Лонгинова В.П. уонна «Албан аат» түмэлин дириэктэрэ Дьячковскай М.В. уруогу ыыттылар.

Ахсынньы 5 күнүгэр А.П.Гоголев аатынан Оҕо искусстватын дьиэтигэр Оҕо бибилэтиэкэтэ төрүттэммитэ 70 сылын чэрчитинэн ыытыллар «Бииргэ ааҕабыт» дьиэ кэргэн күрэһин түмүктүүр биэчэрэ буолла. Манна дьиэ кэргэттэр сатабылларын көрдөрөр “Лучше всех” куонкурус, ону тэҥэ эрдэ ыытыллыбыт дьыссаат саастаах оҕолорго “Мир сказки» викторина оонньуу, эрдэ видеонан оҥоһуллубут “Смотр буктрейлеров” көрүүлэр түмүктэрэ таҕыстылар.