Е. А. Борисов аатынан киин бибилэтиэкэҕэ нэдиэлэ устата ыытыллыбыт тэрээһиннэри билиһиннэрэбит.
Дойдубут тэбэр сүрэҕэр Москва куоракка «Всероссийскай патриотическай форум» буолан ааста. Саха сирин делегациятыттан уопсайа 3 киһи кытынна, ол истэригэр улуустааҕы киин бибилэтиэкэ бибилэтиэкэрэ В. Е. Маркова. Форумҥа патриотическай иитиигэ сыһыаннаах араас конференциялары ыыттылар, спикердарынан президент аппаратыгар үлэлиир үрдүк дуоһунастаах дьон уонна Госдума депутаттара буоллулар. Уопсайа 4000 киһи форумҥа кытынна.
Ахсынньы 10 күнүгэр Кэбээйиттэн төрүттээх бэйиэт, драматург, кэпсээнньит, публицист, декламатор, педагог Иннокентий Наумович Левин — Ньээчис «Эһиэхэ аныыбын күн уотун» саҥа кинигэтин сүрэхтэниитэ буолан ааста. Бу тэрээһини икки улуус кыттыһан ыыттылар. Кинигэ сүрэхтэниитигэр ыраах Кэбээйи улууһуттан 10 тахса киһилээх делегацияны улуус баһылыгын эбээһинэһин толорооччу Сивцев А. С. салайан аҕалла, ону тэҥэ саха норуодунай суруйааччыта биир дойдулаахпыт С. А. Попов-Сэмэн Тумат кыттыыны ылла.
Россияҕа Дьиэ кэргэн уонна Саха суругунан уус- уран литературата төрүттэммитэ 125 сылын көрсө дьон сэргэ сэҥээриитин ылбыт «Чолбон өй күрэһэ» II оонньуута 1-кы сүүмэрдиир түһүмэҕэ ахсынньы 11 күнүгэр киин бибилэтиэкэҕэ онлайн киэбинэн ыытылынна. Күрэс дьон сэргэ уус-уран литератураны уонна суруйааччылар олохторун билиитигэр көрүүтүгэр сигэнэр. Биһиги улууспутуттан 4 дьиэ кэргэн хамаандата кытынна. Кыттааччылар «Саха суругунан уус-уран литературатын төрүттээччилэр», «Репрессияламмыт суруйааччылар», «Улуу Кыайыыга сүгүрүйэн», «Аныгы кэм» диэн 4 салааттан турар тестовай варианынан боппуруостарга эппиэттээтилэр. Салҕыы сүүмэрдэммит кыайыылаах хамаанда Өрөспүүбүлүкэтээҕи 2с түһүмэххэ Дьокуускай куоракка кыттыыны ылыахтара уонна финал саха телевидениетыгар көстүөҕэ. Кыайыылаахтар Өлүөнэ очуостарыгар сынньанар путевканан наҕараадаланыахтара.
Ахсынньы 12 күнүгэр 9-с төгүлүн ыытыллар «Конституцияны төһө билэҕиний» диэн Россиятааҕы улахан тест киин бибилэтиэкэ былаһааккатыгар буолан ааста.
Чурапчы улууһугар Өрөспүүбүлүкэтээҕи бастакы Ыччат киинэ арылынна. Саха Өрөспүүбүлүкэтин социальнай коммуникация миниистирин 1-кы солбуйааччы Надежда Мохначевская кэлэн Е.А. Борисов аатынан киин бибилэтиэкэ үлэтин-хамнаһын, архыып-бибилэтиэкэтин кытта билистэ.
Ахсынньы 12-13 күннэригэр Д. П. Коркин аатынан Чурапчытааҕы спортивнай интернат оскуола 5,6,7,8 кылааһын оҕолоругар С. С. Яковлев — Эрилик Эристиин олоҕун-дьаһаҕын, айар-үлэтин, суруйбут айымньыларын үйэтитии уонна олоҥхоҕо кини киллэрбит кылаатын тула аһаҕас кэпсэтии буолла. Уруогу ыытта Чурапчытааҕы киин бибилэтиэкэ үлэһитэ В. Е. Маркова.
Киин бибилэтиэкэ ыраас, сырдык дьиэтигэр «Кэскил» уһуйаан төрүттэммитэ 55 сыллаах үбүлүөйүн бэлиэтээтэ. Урукку кэмнэргэ үлэлээн ааспыт бэтэрээннэрин ыҥыртаан, улахан бөлөх оҕолоро кыттыылаах, иитээччилэр эҕэрдэ нүөмэрдээх үрдүк таһымнаах үөрүүлээх тэрээһин буолан ааста.
Россияҕа «Дьиэ кэргэн» Саха өрөспүүбүлүкэтигэр «Оҕо саас» сылларынан улуустааҕы «Ыал саргыта» бырайыак чэрчитинэн ыытыллыбыт «Ааҕар саха сайдам ыала» куонкурус кыайыылаахтара барыта 12 ыал сылы түмүктүүр тэрээһиҥҥэ кытыннылар. Ааҕар уонна дьикти дьарыктаах дьиэ кэргэттэр биир былаһааккаҕа түмсэн опыт атастаһан кэпсэтии тэрийдилэр. Чурапчытааҕы ЗАГС салайааччыта Афанасьева А. И.былаһаакка үлэтин иилээн-саҕалаан салайан ыытта. Россия уонна Саха Өрөспүүбүлүкэтин суруналыыстарын уонна суруйааччыларын сойууһун чилиэнэ, поэт, психолог, элбэх оҕо ийэтэ Яна Байгожаева бу былаһаакка үлэтигэр кытынна. Оҕо иитиитигэр, ааҕыыны сайыннарыыга дьиэ кэргэттэр бэйэлэрин дьоһун опыттарын сырдаттылар, түмүгэр салҕыы үлэлииргэ резолюция ылылынна, ону тэҥэ улуустааҕы «Ыал саргыта» бырайыак балаһыанньатыгар сөп түбэһиннэрэн кыайыылаахтары наҕараадалааһын буолла.