Муус устар 7 күнүгэр биир дойдулаахпыт Афанасий Петрович  Романов – Бабаҕа Баатыр “Чехославакияҕа кыайыы оһуохайа. Кырдьаҕас буойун кэпсээнэ. Осуохай победы на земле Чехословакии. Рассказ старого воина»  кинигэ сүрэхтэниитэ буолла.  Муус устар 8 күнүгэр Горнай улууһун баһылыга Н.В.Андреев уонна баһылыгы социальнай боппуруостарга солбуйааччы бибилэтиэкэҕэ ыалдьыттаатылар. Е.А.Борисов архыып-бибилэтиэкэтин фондатын кытта билистилэр.

Бу күн Нам улууһун кииннэммит библиотечнай  ситимин үлэһиттэрэ кэлэн ыалдьыттаатылар, төгүрүк остуол тула кэпсэттилэр, уопут атастастылар. Е.А.Борисов архыып-бибилэтикэтин, фондатын кытта билистилэр, сэдэх кинигэлэр, араас сувенирдар быыстапкаларын интэриэһиргээтилэр, сэргээн көрдүлэр. Салҕыы ыалдьыттар «Көһөрүллүү» мемориалыгар сибэкки дьөрбөтүн уурдулар, А.А.Саввин аатынан Чурапчытааҕы история уонна этнография, «Бойобуой Албан аат» түмэллэригэр экскурсиялаатылар.

Муус устар 9 күнүгэр киин бибилэтиэкэ исписэлиистэрэ Национальнай бибилэтиэкэ тэриллибитэ 100 сылын көрсө ыытыллар дьаһаллар чэрчилэринэн Амма улууһугар илин-эҥэр улуустарыгар аналлаах  «Формирование библиотечных фондов в Республике Саха (Якутия): опыт и инновации» диэн бибилэтиэкэ үлэһиттэрин форумугар баран кыттан кэллилэр.

Муус устар 10 күнүгэр Н. В.Михалева – Сайа, Саха Өрөспүүбүлүкэтин норуодунай суруйааччыта, бэйиэт, прозаик, суруналыыс «Уйгур» диэн сэһэнин  тула ааҕааччылары кытта аһаҕас кэпсэтии буолла. Манна бибилэтиэкэр М.Н.Захарова Сайа олоҕун, айар үлэтин сырдатан кэпсээтэ. Хоһоонноруттан быһа тардан аахтылар. Ол кэнниттэн сүрүн тиэмэлэригэр «Уйгур» кинигэ хайдах суруллубут историятын, Иэйэ уонна Уйгур тапталларын, сэрии кэмигэр дезертир буолуу, олоххо төннүү диэн түһүмэхтэргэ арахсан ыытылынна. Түмүгэр кинигэ куруук ааҕааччыны үөрэтэр суолталааҕын тоһоҕолоон бэлиэтээтилэр, ханнык баҕарар айымньыттан үтүө өрүттэрин үтүктүөххэ, куһаҕан өрүттэрин олох хатылаамыахха наада диэн түмүк оҥоһулунна.

Чурапчытааҕы саастарын ситэ илик оҕолор социальнай-реабилитационнай кииннэрин 4 кылааһын оҕолоругар «Детям о Великой Отечественной войне» диэн интэриэһинэй оонньуулаах уруок ыытылынна. Киин бибилэтиэкэ ааҕааччылары кытта үлэлиир отделын бибилэтиэкэрэ А.П.Капрынова иилээн-саҕалаан ыытта.

Муус устар 11 күнүгэр киин бибилэтиэкэ ааҕар саалатыгар үтүө-үгэс буолбут сыллата ыытыллар  «Пока горит свеча» диэн улуустааҕы оскуола оҕолоругар хоһоон ааҕыытын күрэҕэ буолла. Чурапчы орто оскуолаларын оҕолоро Кыайыы 80 сылын көрсө  бу тиэмэҕэ хоһооннору аахтылар. Дьүүллүүр сүбэҕэ үлэлээтилэр: Чурапчытааҕы П.М.Решетников аатынан народнай театр главнай режиссера И.И.Бушков, Г.П.Башарин аатынан Сылан орто оскуолатын нуучча тылын уонна литературатын учуутала Е.Г.Макарова, Е.А.Борисов аатынан киин бибилэтиэкэ цифровой технологияларга отделын сэбиэдиссэйэ С.К.Флегонтова.

Түмүккэ кыра бөлөххө (5-6 кылаастар): 1 миэстэ — Игорь Слепцов (С.Орлов «Еще тогда нас  не было на свете», ЧСОШ САН), 2 миэстэ – Седалищева Нарыйа (П.Синявский «Девятое мая», ЧСОШ САН), 2 миэстэ – Андреев Боря (Р.Рождественский «Помните», ЧСОШ САН), 3 миэстэ – Игнатьева Нарыйа (Р.Гамзатов «Не хочу войны», Сылан СОШ), 3- миэстэ 6 кылаас кыргыттара (С.Михалков «Письмо солдату», ЧСОШ САН)Улахан бөлөххө (7-8-10кылаастар): 1 миэстэ – Сотников Дамир (А.Храмов «Монолог раненого», 2 миэстэ – Ермолаева Алина (А.Храмов «О войне», ЧСОШ 2), 3 миэстэ – 10 “б” кылаас уолаттара (литературный монтаж «Этих дней не смолкнет слава», ЧСОШ САН), 3 миэстэ — 10 «б» кылаас кыргыттара (литературный  монтаж «Истории, облаченные в чернила», ЧСОШ САН)

Чурапчы орто оскуолатын 6-7 кылааһын оҕолоро бу нэдиэлэҕэ бибилэтиэкэҕэ экскурсиялаатылар, фонданы билистилэр, быыстапкалары көрдүлэр.Бу күн Дьокуускай куораттан Пенсионнай фонда салайааччылара архыып-бибилэтиэкэ үлэтин, фондатын интэриэһиргээн, билсэн бардылар.