Е.А.Борисов аатынан киин бибилэтиэкэ сонуннара

Муус устар 4 күнүгэр киин бибилэтиэкэ ааҕар саалатыгар иистэниэн баҕалаах кэрэ аҥардарга анаан индивидуальнай мерканы ыларга, ону тэҥэ выкройка оҥорорго маастар кылаас буолла. Кыргыттар кэлэн бэйэлэригэр сөп түбэһэр выкройка оҥостон астыннылар. Ааҕааччыны кытта үлэлиир салаа бибилэтиэкэр Л.Т.Никитина ыытта.

Муус устар ый 8 күнүгэр «Саха сирэ»  Өрөспүүбүлүкэ сүрүн хаһыатын кэриспэдьиэнэ Елена Егоровна Потоцкая киин бибилэтиэкэҕэ кэлэн ыалдьыттаата. Бибилэтиэкэ үлэтин-хамнаһын, фондатын кытта билистэ.

Муус устар 9 күнүгэр Е.А.Борисов аатынан киин бибилэтиэкэҕэ биир дойдулаахпыт, Арыылаах нэһилиэгин бочуоттаах олохтооҕо, Гражданскай килбиэн бэлиэ хаһаайына, «Чурапчы» литературнай түмсүү чилиэнэ,  хоһоонньут Анна Дмитриевна Барашкова – Айылҕаана суруйбут “Хорсунун иһин” уордьан кавалера, «Бойобуой сомоҕолоһууну бөҕөргөтүү иһин», “Байыаннай килбиэнин иһин” мэтээллэрдээх биир дойдулаахпыт хорсун аатын үйэтитэр Иннокентий Барашковка анаммыт  «Хоһуун буойун” кинигэтин сүрэхтэниитэ буолла.

Муус устар 10 күнүгэр үөрэх упралениятын көҕүлээһининэн тэриллэр 23 төгүлүн ыытыллар «Улусный фестиваль детского чтения» дьиэ кэргэнинэн ааҕыыны көҕүлүүр улуустааҕы куонкурус буолла. Уопсайа 12 дьиэ кэргэн кыттыыны ылла. Кыайыылаахтар туоһу суругунан, өйдөбүнньүк бирииһинэн наҕараадаланнылар. Дьүүллүр сүбэҕэ киин бибилэтиэкэттэн Флегонтова С.К., Лонгинова В.П., ону тэҥэ оҕо бибилэтиэкэтин сэбиэдиссэйэ Эверстова О.Г. үлэлэстилэр.

Бу күн киин бибилэтиэкэ ааҕар саалатыгар Чурапчы улууһун муниципальнай архыыбын семинара буолла.

Муус устар 10 күнүгэр Саха Өрөспүүбүлүкэтин үөрэҕириитин туйгуна, үтүөлээх үлэһитэ “Туллукчаан” уһуйаан иитээччитэ Ирина Дмитриевна Захарова оҕону сахалыы ситимнээх уус-уран саҥатын сайыннарарга муспут баай уопутун, мэтиэдикэтин тарҕатар «Айылгылаах тыл аартыга» кинигэ-босуобуйа сүрэхтэниитигэр Е.Борисов аатынан Чурапчы киин бибилэтиэкэтин ааҕааччыны кытта үлэ отделын сэбиэдиссэйэ Е.Н.Дьячковская босуобуйа ырытыытын оҥордо. Кинигэ элеменнэрин, аппараатын, түһүмэхтэрин, мэтиэдикэтин кытта тэрээһиҥҥэ кэлбит дьоҥҥо сиһилии билиһиннэрдэ. Иитэр-үөрэтэр эйгэ бары үлэһиттэригэр, төрөппүттэргэ улахан наадалаах, туһалаах босуобуйа тахсыбытын бэлиэтээтэ.

Киин бибилэтиэкэ ааҕар саалатыгар Аан дойдутааҕы доруобуйа күнүн чэрчитинэн «»Доруобуйа-биһиги баайбыт» истиҥ көрсүһүү буолла. Кэлбит ыалдьыттарга уһун үйэлэниигэ туһалаах гимнастиканы «Чэбдик» кулууп чилиэнэ, чөл олох пропагандиһа Николай Новгородов көрдөрдө, Эмтээх оту күннээҕи олоххо туһаныыны киин бибилэтиэкэ бибилэтиэкэрэ В.Е.Маркова кэпсээтэ, Тар кистэлэҥин сырдатта Зоя Сивцева, ону тэҥэ медицинскэй сүбэлэри П.Н.Сокольников аатынан оройуоннааҕы киин балыыһа исписэлиистэрэ Сахайа Пудова, Федианна Атласова кэлэн сиһилии кэпсээтилэр. Кэлбит дьон астынан тарҕастылар.