Е.А.Борисов аатынан киин бибилэтиэкэ нэдиэлэтээҕи сонуннара
Кулун тутар 6 күнүгэр Чурапчы нэһилиэгин олохтооҕо Дьячковская Айталина Савельевна бэйэтин үтүө баҕа санаатынан киин бибилэтиэкэ пуондата хаҥыырын туһугар бэртээхэй кинигэлэри бэлэх уунна.
Кулун тутар 10,11 күннэригэр С.А. Новгородов аатынан чурапчытааҕы орто оскуола 8 уонна 9 кылаастарын үөрэнээччилэригэр «Урок творчества – Фелтенг-театр» буолла. Манна оҕолор бэйэлэрэ хатайдааһын ньыматынан оҥорбут куукулаларын саҥардан оонньоон көрдөрдүлэр. Р.И.Корякина – Хотууна суруйбут “Үтүө санаалаах куобах” диэн остуоруйатын киин бибилэтиэкэттэн М.Н.Захарова баран оруолларынан аахтарда, үөрэттэ. Хатайдааһын ньыматынан оҥоһуллубут оҥоһуктарын көрдөрдө, сүбэ-ама биэрдэ.
Кулун тутар 11 күнүгэр киин бибилэтиэкэҕэ «Живая классика» бүтүн Россиятааҕы куонкурус муниципальнай түһүмэҕэ буолан ааста. Манна киин бибилэтиэкэ ааҕааччыны кытта үлэлиир салаа сэбиэдиссэйэ Е.Н.Дьячковская, ону тэҥэ оҕо бибилэтиэкэтин сэбиэдиссэйэ О.Г.Эверстова дьүүллүүр сүбэҕэ үлэлээтилэр.
Кулун тутар 12 күнүгэр А.А.Саввин аатынан Чурапчытааҕы история уонна этнография түмэлин дьиэтигэр А.А.Саввин төрөөбүтэ 130 сылыгар анаммыт «Саввин тэлбит суолунан» диэн оскуола оҕолоругар научнай — практическай конференция буолла. Киин бибилэтиэкэттэн ааҕааччыны кытта үлэлиир салаа бибилэтиэкэрэ В.П.Лонгинова «Үйэлээҕи өтө көрөн» кинигэ быыстапкатын туруорда. Кииннэммит библиотечнай ситим библиограба Кузьмина М.Н. дьүүллүүр сүбэҕэ үлэлээтэ.
Кулун тутар 13 күнүгэр Дьокуускай куоракка Н.Д.Неустроев аатынан «СМАРТ» бибилэтиэкэҕэ бастакы култуура үлэһиттэригэр аналлаах өрөспүүбүлүкэтээҕи библиотечнай, профсоюзнай форум буолла. Манна Чурапчытааҕы кииннэммит библиотечнай ситим бибилэтиэкэрдэрэ кыттыыны ыллылар.
Бу күн С.А.Новгородов аатынан Чурапчы орто оскуолатын 8в, 8а, 8г, 9а кылаастарын үөрэнээччилэригэр профориентационнай уруоктар ыытылыннылар. Уруоктары ааҕааччыны кытта үлэлиир салаа бибилэтиэкэрдэрэ Л.Т.Никитина уонна А.С. Маркова ыыттылар.
Киин бибилэтиэкэҕэ Дьокуускай куораттааҕы библиотечнай ситимин «Книга — 03» бибилэтиэкэтин сүрүннүүр бибилэтиэкэрэ А.Н.Бояркина уонна библиограба Н.В.Протодьяконова доруобуйаларынан хааччахтаах дьону кытта хайдах үлэлэһэргэ бэйэлэрин уопуттарын кэпсээтилэр, туһалаах сүбэлэри биэрдилэр, туһааннаах боппуруостарга эппиэттээтилэр. Ону тэҥэ киин бибилэтиэкэҕэ кинигэлэри бэлэх ууннулар.
