Е.А.Борисов аатынан киин бибилэтиэкэ нэдиэлэтээҕи сонуннара

Ахсынньы 17 күнүгэр «Олохтоох көҕүлээһиннэри сайыннарар агенство» исписэлииһэ Старостина С.Д. киин бибилэтиэкэҕэ грантовай бырайыагы хайдах сөпкө суруйарга, туох быраабылалааҕын, туох хайдах буолуохтааҕын быһааран, бэйэтин сүбэтин биэрдэ.

Бу күн  Е. А. Борисов аатынан киин бибилэтиэкэ уонна П.И. Борисова аатынан “Улыбка” уһуйаан холбоһуктаах дьиэ кэргэнинэн ааҕыы бырайыактарын чэрчитинэн уһуйаан төрөппүттэригэр аналлаах «Саҥа дьылга бэлэмнэнии» тэрээһинэ буолла. Манна Р.Г.Дьячковская харыйа симэҕин хайдах оҥорору көрдөрдө. В.Е. Маркова эмтээх оттору хатаран чэй, мыыла ону тэҥэ чүмэчи оҥоруутун кэпсээтэ, В.П.Лонгинова саҥа дьыл уһун өрөбүллэригэр, сынньалаҥҥа ханнык кинигэни ааҕыахха сөбүн туһунан сүбэлээтэ, Л.Т. Никитина кумааҕыттан киэргэл оҥорору көрдөрдө.

Киин бибилэтиэкэ ону тэҥэ оҕо бибилэтиэкэтэ сылын аайы ыытыллар «Үтүө санаа харыйата» акцияҕа кытынна.

Ахсынньы 18 күнүгэр үп салаата тэриллибитэ 95 сыллаах историятын кэпсиир «Үп салаатын кэрдиис кэмнэрэ” кинигэ сүрэхтэниитэ буолла. Кинигэни үбүлээн таһаарда: Чурапчы улууһун үпкэ управленията. Салайааччы Т.Т.Брызгаева, кинигэни хомуйан оҥордулар: Л.Р.Ноева, Н.С.Борисова.